1 God, iau pirlat ugu.
2 kanong ira sakana tunotuno ma ira ut na harabota diet te papos ira ha diet wara tangtange haliare iau.
3 Diet tur luhutane iau ma diet se ira milmilikuan na nianga.
4 Diet balu pukus ira nugu harmarsai ma ra nianga na hartutung,
5 Diet balu iau ma ra saksakena uta ira nugu bilbilai,
6 Pilak tiga sakana tunotuno wara tangtange haliare no nugu ebar.
7 Ing bia na tur ra harkurai, bale bia da tung soot ie,
8 I tahut bia pa na lon lawas,
9 Iau sip bia ira natine na taie adiet ta sus
10 I tahut bia ira natine diet na maris sokopi ma diet na goota hurbit wara saring mangana linge wara harharahut diet.
11 Ma bia iakan ra tunotuno ga saring leh tiga linge, ma pai balu pukus, iau sip bia da palim bakut leh ira uno linge,
12 I tahut bia taie tikai pa na marsei,
13 Bale bia ira uno bulumur diet na maat bakut,
14 Iau sip bia no Watong na lik kawase ira magingin sakena ta ira hintubuno,
15 I tahut bia ira udiet magingin sakena pa na panim laah meram ho God,
16 Iau sip huo kanong pa gale lik tunat bia na gil ta bilbilai,
17 Git sip bia na huli ira tunotuno.
18 Git se ira nianga na harhuli ta ira kaba bungbung hoing git singsigam ira kiniasine huo.
19 Io, i tahut bia kaike ra nianga na harhuli na kakarat dikdikit tana hoing ra sigasigam,
20 I tahut bia kaiken ra linge na hanuat ho ira kunkulaan meram hono Watong taar ta diet ing diet tung iau,
21 Iesen augu, Watong Kiskis,
22 Kanong warah, iau tiga maris ma a nugu mon sunupi,
23 Iau pataam hanahaan ho ira ududuh na kasakes tano matarahien.
24 Ira buku na kakigu i maalum kanong iau milo.
25 Diet ing diet tung iau, diet miliguruane iau.
26 Watong, no nugu God, harahut iau.
27 Hamines ta diet bia diet na nunure bia no limaam i te pakile iakan,
28 I tale bia diet na ianga na harhuli, iesen augu, nu haidane iau.
29 Diet ing diet tung iau, diet na manga malahuan,
30 Iau ni manga pirhakasing no Watong ma no hagu.
31 kanong i la tur taar tano kata na limana nong auno mon sunupi,