1 Umwana mwitegeereza, ngiisi byo yishe ali mu múyigiriza, ali mu bisimbaha.
2 Abandu biija bali mu deta amagambo goꞌbwitegeereze, banali mu gagenduukirwa mwo.
3 Ngiisi úli mu yitonda mu kudeta, ali mu yikingira atafwe.
4 Umwolo ali mu yifwija ikindu kirebe, si ndaahyo ali mu longa.
5 Umundu mwija ali mu shomba ibibeesha.
6 Ngiisi úli mu gira íbikwaniini, biri mu múlanga.
7 Hali umundu úli mu yihaya kwo ali mugale, ndaanahyo ahiiti.
8 Umugale, ikyanya ali mu teerwa, angakoleesa ubugale mu kuyiguluula.
9 Abandu biija, bali mu tanguula bweneene!
10 Ikyanya umundu agweti agayiheemya, ali mu kizi longoola.
11 Ibindu íbyatwibwa ku manyuku, biri mu mala duba.
12 Ikyanya umundu ali mu biika umulangaaliro kwiꞌgambo, linabe lyatinda, ali mu hebuura.
13 Ikyanya abandu bali mu gayiriza ihano, bali mu yiteera boonyene.
14 Amigirizo goꞌmwitegeereza, yo shyoko íri mu leeta ubugumaana.
15 Abitegeereza bali mu longa ulushaagwa.
16 Umwitegeereza ali mu ba asobanukiirwi.
17 Umutungwa mubi ali mu kizi leeta makuba.
18 Ngiisi útali mu twazania, ali mu herera mu bukeni, anateezibwe ishoni.
19 Ikyanya umundu ali mu longa byo ashuba mu yifwija, umutima guli mu kizi shambaala.
20 Ngiisi úli mu komeerana noꞌmwitegeereza, naye ali mu ba mwitegeereza.
21 Umundu, ikyanya ali mu gira ikyaha, ali mu yikululira amakuba.
22 Umundu mwija, ali mu sigira abaana baage byo bagahyana, halinde na ku bijukulu.
23 Indalo yoꞌmukeni, hali ikyanya iri mu hemba bweneene!
24 Umubusi, ikyanya atali mu hana umwana wage, iri amúshombiri.
25 Umundu mwija ali mu lya, anayigute.