1 Yurukɔɔlɔ to wi sɛwɛ yurugo. Kore pinambiile pe Yɛnŋɛlɛ gbɔgɔyurugo.
2 Yoro tara woolo ye ni fuun yege wogo ŋga ki logo,
3 yoro lepigile naa legbɔɔlɔ pe ni,
4 Mi yaa kajɛnmɛ sɛnrɛ yo wa na yɔn,
5 Mi ma nuŋgbolo jan na kajɛnmbɛlɛ pe yomiyɛgɛlɛ ke nuru;
6 Ali na tipege ka gbɔn na na,
7 Pe jigi wi yɛn pe yarijɛndɛ to na,
8 Ma si yala, lere wa kpɛ se ya mboo lewee yɛnlɛ wa go shɔ,
9 Pe go shɔgɔ sara wi sɔnŋgɔ kì ŋgban ma toro,
10 Pe yɛn naga yaan ndɛɛ pe yaa koro yinwege na suyi,
11 We yɛn naga yaan fɔ kajɛnŋɛ wi ma ku,
12 Pe maa ki sɔnri pe yinrɛ ti yaa koro wa sanga pyew,
13 Ɛɛn fɔ sɛnwee mboo ta wa wi fɛrɛwɛ pi ni, wila ki jɛn mbe yo fɔ wi se mɔ,
14 Mbele pe ma pe jigi wi taga pe yɛɛ na, pa pe kɔwɔ pi yaa ka pye ma,
15 Pe maa pe kɔnri paa simbaŋgbelege yɛn na kee pe ni wa kuulo tara,
16 Ɛɛn fɔ Yɛnŋɛlɛ li yaa na go shɔ, mbanla wɔ wa kuulo tara ti ni,
17 Na lere wa ka pye penjagbɔrɔ fɔ, kiga ka ma jatere wi piri ma na,
18 katugu na wiga ka ku, wi se ka kari yaraga ka kpɛ ni,
19 Mboo ta yinwege na sanga ŋa ni, wi mbe ya mbe yo fɔ wi yɛn fɛrɛwɛ na,
20 Konaa ki ni fuun ni, wi yaa ka ku mbe taga wa wi tɛlɛye pe na wa pe karisaga,
21 Ɛɛn fɔ sɛnwee mboo ta wa wi fɛrɛwɛ pi ni, wila ki jɛn mbe filige ki na,