1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo.
2 Katugu lepeele naa nambara fɛnnɛ pè pe yɔn ki yɛngɛ na na, na baga na na,
3 Mbɛnwɛ sɛnrɛ to pe maa yuun na na lagapyew,
4 Ali mbege ta poro yɛn ma mi ndanla, pe yɛn mala panra,
5 Pe mala kajɛŋgɛ ki fɔgɔ tɔn kapege ni,
6 Pe yɛn na yuun fɔ: «Ki daga lepee wa mbe yiri wi kɔrɔgɔ mboo le kɛɛ,
7 Na pe ka kiti kɔn wi na, kiti wi to wi na,
8 «Ki daga wi yinwege piliye yi were,
9 Ki daga wi piile pe pye pijiriwele,
10 Ki daga wi piile pe pye lejagala paa yaara yɛnri,
11 Ki daga fɔrɔ fɛnnɛ pe saa pe kɛɛ yaara ti ni fuun ti koli,
12 Ki daga lere kpɛ ka ka kajɛŋgɛ pye wi kan,
13 Ki daga wi setirige piile pe tɔngɔ pe wɔ wa,
14 Ki daga Yawe Yɛnŋɛlɛ li jatere wi pye wi tɛlɛye pe kajɔgɔrɔ ti na,
15 Ki daga pe kapere ti pye Yawe Yɛnŋɛlɛ li yɛgɛ sɔgɔwɔ sanga pyew,
16 «Ko yaa pye ma, katugu ki lerefɔ wi sila ki jate mbe kagbaraga pye lere kan,
17 Mbaa leele daŋgi ko kìla wi ndanla,
18 Wìla pye na leele pe daŋgi suyi, koni ki daga daŋga kuu le derege,
19 Daŋga ki pye paa yaripɔrɔ yɛn mboo tɔn,
20 Mbele pe yɛn na baga na na konaa mbele pe yɛn na sɛnpere yuun na na,
21 Ɛɛn fɔ mboro wo na, Yawe Yɛnŋɛlɛ, na Fɔ, na saga ma mɛgɛ ko kala na,
22 Mi yɛn yuŋgbɔgɔrɔ fɔ naa fyɔnwɔ fɔ,
23 Mi yɛn na koo na kee paa yɛgɛ ŋga na yɔnlɔkɔgɔ yinmɛ ma kaa kɔ ma kari,
24 Na kanŋguuro ti yɛn na seri na na yeŋge lemɛ pi kala na,
25 Ki leele pe yɛn nala tifaga,
26 Yawe Yɛnŋɛlɛ, na Yɛnŋɛlɛ, na saga!
27 Na juguye pege jɛn fɔ ma yawa po pì ko pye ma,
28 Ali na poro kaa na daŋgi, mboro wo na, ma yaa duwaw na na,
29 Mbele pe yɛn na baga na na, poro mbe tifaga,
30 Mi yaa la Yawe Yɛnŋɛlɛ li shari mbaa li sɔnni magaŋgbɔlɔ ni,
31 katugu li ma yere fyɔnwɔ fɔ wi tanla mboo saga,