1 Na pinambyɔ, na sɛnrɛ ti lɛ,
2 Maa tanri na ŋgasegele ke na, pa ma yaa yinwege ta;
3 Mari le wa ma yombɛgɛlɛ ke na paa vegeŋɛ yɛn,
4 Maga yo kajɛnmɛ pi kan fɔ ma yɛn na nɔsepyɔ sumboro,
5 jaŋgo pila ma go singi nanjaa wi na,
6 Pilige ka, mìla pye wa na go ki fenɛtiri wi na,
7 A mì si lefɔnŋɔ wa yan wa lembire ti sɔgɔwɔ,
8 Wìla pye na tooro wa ca nawa konɔ li ni, le ki jɛlɛ cɛnlɛ wa laga tanla;
9 Kìla pye yɔnlɔ tosanga wi ni, yɔnlɔkɔgɔ yɛgɛ ni;
10 Mbe ka wele, mɛɛ jɛlɛ wa yan wi pan mboo fili;
11 Wìla pye wɛrɛwɛrɛfɔ naa fɛrɛmbandaa;
12 Sanni jɛnri wi ma pye wa ca nawa koŋgolo ke ni, sanni jɛnri mbe pye wa katoro ti ni;
13 A ki jɛlɛ wì si yiri ma lefɔnŋɔ wi yigi, ma magala wi ni,
14 «Mila daga mbe nayinmɛ saraga wɔ mbanla yɔn fɔlɔ tɔn,
15 Ko kala na mì yiri ma pan mbɔɔn fili,
16 Mì yarisinlɛɛrɛ ti jan mala sinlɛsaga ki gbegele maga yɔn makɔ;
17 Mì nuwɔ taanyaara wo wa na sinlɛsaga ki na,
18 Pan we sa ndanlawa kala li pye we tin li na, we yɛgɛ kila kanŋgi fɔ sa gbɔn goto pinliwɛ ni,
19 Katugu na pɔlɔ wi woro ca,
20 Wùu penjara bɔtɛlɛ li lɛ mali yin penjara ni,
21 A ki jɛlɛ wì si lefɔnŋɔ wi fanla, ma fanŋga ta wi na wi yɔn sɛnrɛ ti ni;
22 Le ki yɔngɔlɔ nuŋgba ke ni, lefɔnŋɔ wì si yiri ma taga wi na,
23 fɔ wanla la mbe ka pan luu sunndo wi sun mboo furu,
24 Koni na pinambiile, yaa nuru na yeri,
25 Maga ka ma jatere wi yaga wɔɔn tile mbe taga ki jɛlɛ cɛnlɛ ŋa wa puŋgo na,
26 Katugu wì nambala lɛgɛrɛ jan ma pe gbo;
27 Wi go ko ki yɛn kuulo tara konɔ le,