1 Ma yaakara wara jɛnri ta ma ka yɛyinŋge na,
2 Kulo ŋa wi yɛn tijinliwɛ fɔ wi yaa ka cɛn wi tafɔ wi pinambyɔ lejaga wi go na;
3 Pe ma warifuwe wi yan wa fugufugu kasɔn ki ni, mbe tɛ wi yan wa yira kasɔn ki ni mberi pye kpoyi,
4 Kapege pyefɔ wo wi maa nuru sɛnpere yofɔ wi yeri;
5 Lere ŋa wi maa tɛgɛ fyɔnwɔ fɔ wi na, wi dafɔ wo ki fɔ wi maa tifaga;
6 Pishyɛnwoolo pe yɛn paa wunluwɔ njagala yɛn lelɛŋgbaŋgala ke kan;
7 Sɛnjɛndɛ ti woro ma yala wa lembige ki yɔn;
8 Yarikanra nda ti ma kan larawa, ti yɛn paa sinndɛlɛgɛ sɔnŋgbanga wogo yɛn ti kanfɛnnɛ pe yɛgɛ na;
9 Lere ŋa wi ma kajɔɔgɔ ŋga kì pye wi na ki kala yaga, wi maa ki jaa ndanlawa mbe pye pe sɔgɔwɔ;
10 Lere ŋa wì jilige mboo jɛrɛgi, ki ma ye wi ni,
11 Lepee wi maa ŋga jaa ko yɛn mbe yiri mbe je;
12 Cɛngɛ urusi ŋga ki piile pè wɔ ki kɛɛ, a kì jangari, mbe sa fili ko ka ni,
13 Lere ŋa wi ma kajɛŋgɛ ki fɔgɔ tɔn tipege ni,
14 Mbe malaga kɔn ki yɛn paa yɛgɛ ŋga na ma ma kaa lasulugo yɛngɛ we;
15 Lere ŋa wi ma tanga kan lepee wi yeri, konaa ŋa wi ma lesinŋɛ wi le jɔlɔgɔ,
16 Mbe penjara le lembige ki kɛɛ ki sa kajɛnmɛ lɔ,
17 Wɛnnɛ pe ma pye ma pe yɛɛ ndanla wagati pyew,
18 Tijinliwɛ fu fɔ wo wi ma yɔn kan,
19 Lere ŋa maara yɛn maa ndanla, kapege ko ki yɛn maa ndanla;
20 Lere ŋa wi nawa pi woro ma filige wi na, wi se fɛrɛwɛ ta;
21 Lere ŋa wi ma lembige ki se, wi wogo yɛn jatere piriwɛn;
22 Nayinmɛ pi maa yambagawa kaan;
23 Lepee wi ma yarikanra nambara woro shɔ larawa,
24 Tijinliwɛ fɔ wila puŋgo kajɛnmɛ po na;
25 Pyɔ ŋa wi yɛn lembige, wi maa to wi nawa pi tanga wi na;
26 Ki woro ma yɔn pe wɔnɔ wa lesinŋɛ wa na;
27 Lere ŋa wi maa wi sɛnyoro ti kɔrɔsi, wo yɛn ma kala jɛn;
28 Ali yɛrɛ tijinliwɛ fu fɔ, na wi ka pyeri, pe maa ki jate ndɛɛ wi yɛn kajɛnŋɛ;