1 Mi yɛn lere ŋa jɔlɔgɔ gbɔn wi na,
2 Lìlan yɛgɛ sin ma kari na ni wa diwi wi ni;
3 Lìli kɛɛ ki yirige mi nuŋgba na,
4 Lì ti mì cɔgɔ, fɔ a na witige sɛlɛgɛ kì tiletile;
5 Lì nandangawa naa jɔlɔgɔ ki tɛgɛ
6 Lìlan tɛgɛ wa diwi wi ni,
7 Lì mbogo wa mala maga, jaŋgo mi ka ka ta mbe yiri;
8 Mì gbele ŋgbanga, ma yeri na sagafɔ jaa,
9 Lìlan konɔ li tɔn sinndɛɛrɛ tugbɔɔrɔ nda pè tɛtɛ ta ni,
10 Lì lara nala singi paa yɛgɛ ŋga na cɛngɛ urusi ki ma lara na singi we,
11 Lìlan wɔ wa na konɔ li ni, mala kɔɔnlɔ yuroyuroyuro paa cɛngɛ yɛn;
12 Lì li sandiga wanla li taga naga tile;
13 Lìlan wɔn mala furugu
14 Mì pye titɛgɛrɛ yaraga na woolo pe ni fuun pe yeri;
15 Lìlan nawa pi tanga na na yaanga taanga ni,
16 Lìlan yɔn ki kan wa yaanŋgumbire ti na mala ŋgangala ke kaari;
17 Màla wa lege mala laga lali yɛyinŋge ki ni,
18 Ki kala na, mì yo fɔ: «Na goto wì jɔgɔ pew;
19 Na mi kaa sɔnri na jɔlɔgɔ naa na tege ki na,
20 Mi yɛn na nawa tuun ki na suyi,
21 Ɛɛn fɔ kala na mi yɛn na sɔnri li na, loli na yɛɛn,
22 Yawe Yɛnŋɛlɛ li kagbaraga pyege kii kɔ,
23 Ti maa kanŋgi fɔnndɔ pinliwɛ nuŋgba nuŋgba pyew.
24 Mi yɛn naga yuun wa na nawa fɔ: «Yawe Yɛnŋɛlɛ lo li yɛn na tasaga ye;
25 Lere ŋa kaa jigi wi taga Yawe Yɛnŋɛlɛ li na,
26 Mbe pyeri mbaa Yawe Yɛnŋɛlɛ li singi lɔɔn shɔ,
27 Mbe jɔlɔgɔ ki kun ma yɛɛ ni ma lefɔnrɔ sanga wi ni,
28 Na Yɛnŋɛlɛ li ka wamawelewe wa wi na,
29 Ki daga wi fɔli wuu yɔn ki kan wa taambugɔ ki ni,
30 Ki daga wuu mbatelege ki jan wi felefɔ wi kan,
31 Katugu Yawe Yɛnŋɛlɛ laa sɛnwee wi wa
32 Ɛɛn fɔ ali na li kɔɔn le jɔlɔgɔ, li maa yinriwɛ taa,
33 katugu ki woro li nandanwa kala mbe jɔlɔgɔ wa sɛnwee wi na,
34 Ɛɛn fɔ na ye kaa tara ti kasopiile pe ni fuun pe
35 na yaga sɛnwee wi kaselege ki kanŋga mbe tɔn ki na,
36 na yaga lere wi kiti wi kɔn mboo kolo wa kiti kɔnsaga,
37 Ambɔ wi mbe ya para mbe ti kala la mbe pye,
38 Naga yɛn ma, Yɛnŋɛlɛ na yaara ti ni fuun ti go na, lo ma li maga yo
39 Yiŋgi na sɛnwee mboo ta yinwege na, wii je wila kɔngɔri?
40 We we tangalɔmɔ pi sɛgɛsɛgɛ, we sɔnri pi na jɛŋgɛ,
41 Ye pan we we kɛyɛn yi yirige we wa wa Yɛnŋɛlɛ na wa naayeri li yeri,
42 Woro wo na, wè kapere pye ma na, ma yiri ma je;
43 Mɔ̀ɔ naŋgbanwa gbɔɔ pi lara, ma taga we na ma we purɔ;
44 Màa ma yɛɛ fo kambaaga ka ni,
45 Mà we pye paa kayangara nda pe ma pɛ ti yɛn,
46 We juguye pe ni fuun pè pe yɔnrɔ ti yɛngɛ
47 Sunndo kɔngɔ konaa mbe to wetijugo ni to ti yɛn we woro,
48 Na yɛntunwɔ pila fuun paa lafogo yɛn,
49 Na yɛntunwɔ pi yɛn na tinri kɔnlɔ fu jatere piriwɛn pi kala na,
50 fɔ Yawe Yɛnŋɛlɛ mbeli ta wa naayeri,
51 Ŋga kì gbɔn na ca sumborombiile pe na,
52 Mbele pè pye na juguye go fu,
53 Pàa na wa wege ka ni naga jaa mbanla gbo,
54 Tɔnmɔ pìla toro na go na.
55 A mì si koro wa wege ki nɔgɔna,
56 Màla magala li logo, ma yo fɔ:
57 Mìla ma yeri mala saga pilige ŋga ni, màa fulo na tanla;
58 Yawe Yɛnŋɛlɛ, mà yere na kala li ni ma para,
59 Yawe Yɛnŋɛlɛ, kapere nda pè pye na na, màri yan,
60 Kayaŋga ŋga pè wɔ na ni, màga yan,
61 Yawe Yɛnŋɛlɛ, tɛgɛlɛ na fuun paa na tegele, màli logo,
62 Pe yɛn na pe sɛnrɛ ti yuun na waa na na,
63 Wele, pe yɛn ma cɛn o, pe yɛn ma yere o,
64 E, Yawe Yɛnŋɛlɛ, ŋga pè pye na na,
65 Pe kotogo ki ŋgban pe na,
66 Yawe Yɛnŋɛlɛ, ma naŋgbanwa pi tɛgɛ ma pe purɔ,