1 Koni yeri ma wele! Ambɔ wi yaa ta mbɔɔn yɔn sogo?
2 Naŋgbanwa pi ma lembige ki gbo,
3 Mìla lembige ki yan kila jiti na kee yɛgɛ,
4 Yɛnŋɛlɛ sa ti sagafɔ ka ka ta ki piile pe na,
5 Yarilire nda pè kɔn, Yɛnŋɛlɛ sa ti fuŋgo yɛn mbele na, pe pan peri ka pew!
6 Jɔlɔgɔ kila fi mbe yiri wa tara paa tige yɛn,
7 Ɛɛn fɔ sɛnwee wi ma se mbaa jɔlɔ,
8 Mi wo na, ndɛɛ mi ja pye mboro, mi jɛn nala kala li le Yɛnŋɛlɛ lo kɛɛ;
9 Yɛnŋɛlɛ li maa kagbɔgɔlɔ piin, ŋgele kè toro sɛnwee wi jatere pyege na;
10 Lo li ma ti tisaga ki ma pan laga tara ti na,
11 Li ma mbele pè pe yɛɛ tirige pe yirige naayeri,
12 Tijinliwɛ pee fɛnnɛ pè kagala ŋgele kɔn mbe pye, li ma ke jɔgɔ;
13 Li ma kajɛnmbɛlɛ pe yigi pe yɛɛra tijinliwɛ pee pi ni,
14 Diwi wi ma ye pe na yɔnlɔ na;
15 Ɛɛn fɔ Yɛnŋɛlɛ li ma fyɔnwɔ fɔ wi shɔ ki leele pe yɔn sɛnpere ti kɛɛ,
16 Li ma jigi tagasaga kan ŋa wi fanŋga kì kɔ wi yeri,
17 Ki kala na, Yɛnŋɛlɛ li ka lere ŋa jɛrɛgi mboo le konɔ, fɛrɛwɛ yɛn ki fɔ wi woo;
18 Katugu lo li ma sɛnwee wi wɛlɛgɛ, lo li mɛɛ wi sagbanra ti fɔ;
19 Jorowo kagala kɔgɔlɔni mbe gbɔn ma na, ɛɛn fɔ Yɛnŋɛlɛ li yaa ma shɔ ke ni fuun ke ni;
20 Fuŋgo sanga ni, li yaa ma shɔ kunwɔ pi kɛɛ,
21 Yɛnŋɛlɛ li yaa ma shɔ lepeele pe lesangara sɛnrɛ ti kɛɛ,
22 Ma yaa kaa tɛgɛ jɔgɔwɔ sanga naa fuŋgo sanga ni, mbege yan fɔ ki woro yaraga ka,
23 katugu sinndɛɛrɛ se ka pye wa ma kɛɛrɛ ti ni,
24 Ma yaa kaga yan fɔ yɛyinŋge ki yɛn wa ma go,
25 Ma yaa kaga yan fɔ ma setirige piile pe yɛn na lege,
26 Ma yaa ka lɛ mbe tin yinwege ki na si jɛn mbe ku pɔɔn le wa fanga ki ni,
27 Wele, wè ki kala li cancan jɛŋgɛ mali wele, pa li si yɛn ma.