1 Likatɔlɔye pe ma pe piile pe se sanga ŋa ni, maa jɛn le?
2 Pe ma yeyɛn yɔn ŋga pye kugbɔ ki ni mbe si jɛn mbe se, ma maga jɛn le?
3 Pe ma sugulo, mɛɛ pe piile pe se;
4 Pe piile pe ma fanŋga ta, ma lɛ wa yan,
5 Ambɔ wi yan sofile wi yaga wi yɛɛ kan wila kee?
6 Tara nda ti yɛn ma waga, mìri pye wi laga,
7 Wi kala woro wa ca nawa tinmɛ pi ni,
8 Wi maa yanri na toro wa yanwira ti na naa yaakara ti lagajaa,
9 Naga yɛn ma, yannɔ wi mbe yɛnlɛ mbaa tunŋgo piin ma kan le?
10 Ma mbe ya mboo le maŋga na mbe yo wila fali ma kan le?
11 Naga yɛn ma, mboro mbe yɛnlɛ mbɔɔn jigi wi taga wi na, fɔ wi yɛn fanŋga ni,
12 Ma mbe yɛnlɛ mbe taga ki na fɔ wi yaa ma yarilire ti shiye ma kan,
13 Kɔnrɔsogolo wi maa wi kanwira ti gbɔɔn yɔgɔrimɔ ni,
14 Wi maa jɛnrɛwɛ pi se le tara, mbe kari mboo toro le,
15 Wi ma fɛgɛ ki na fɔ yaraga ka mbe ya mboo tangala mboo yaari tɔlɔgɔ ni,
16 Wi yɛn ma wɛli wi piile pe ni, ndɛɛ wo yɛɛra piile ma,
17 Katugu Yɛnŋɛlɛ lii kajɛnmɛ kan wi yeri,
18 Ɛɛn fɔ na wi ka yiri mbe yere mbaa fee,
19 Naga yɛn ma, mboro ma fanŋga kan shɔn wi yeri wi le?
20 Mboro ma ti wi ma ya na yeni paa gbatɔ yɛn wi le?
21 Wi maa gbunlundɛgɛ tara ti gbɔɔn wi yenjoro ti ni, na yɔgɔri wi fanŋga ki kala na,
22 Wila la fyɛrɛ ti jate yaraga ka, yaraga ko ka kpɛ na sunndo kɔngɔ wa wi na,
23 Sanŋgbɔ ŋa wi yɛn ma yanŋga wi kanŋgaga ki na, wi maa tinni wangala ke ni,
24 Wi maa wire mbaa fee mbaa kee lagapyew,
25 Na paga mbanlaga ki win, wi ma gbele maga shɔ hanhan,
26 Naga yɛn ma, mboro ma ma tijinliwɛ pi kan gbinlɛ wi yeri, wi mɛɛ ya ma yiri sire na wi le?
27 Naga yɛn ma mboro ma ma konɔ kan yɔn wi yeri wi mɛɛ yiri wa naayeri wi le?
28 Pa wi cɛnsaga ki ma pye wa waara ti sɔgɔwɔ, pa wi maa wɔnlɔ wa,
29 Wi ma koro wa ki laga ki na, na wi kagboro ti pɛɛlɛ,
30 Wi piile pe ma kasanwa pi wɔ,