1 Odurdaked-Saila David-machi, Jerusalén-neggweburgi-reyga-megisadi, weyob sogsagusad:
2 “We-napneggi-ibmar-imaklegedi, binsarsunna imakleged,
3 Dule we-napneggi na gandikidba-alamakdiile,
4 Dulemar gwalulemamaid. Bamaladdi burgwemamaid.
5 Dad-ibeler nakwiardaed, argwatedabalid.
6 Burwa-goledi, dad-nakwed-argan-nuedsik gollardaed,
7 Bela diwarmar demarse nomaid,
8 Bela we-ibmargi-sunmaklegedi, budar-itoleged uked,
9 Bato ibmar-gusadi, gannar gunonibaloed.
10 Dule-gwensak, sokardibe:
11 Ibmar-epenne-gusmaladi, bela ielesad.
12 Ani, an emar-odurdakedid, an Israel-yargi, Jerusalén-neggweburgi reyga mai gusad.
13 An nue-binsaed-nikadba bela we-napneggi-ibmar-imakleged-e-burba-baraminai, degi, egi nergunai an gusad. Bab-Dummad dulemarga we-arbaed-dummad uksad, adi, egi arbadii gumalagar.
14 Bela we-napneggi ibmar-imaklegedi, an daksad. Bela a-ibmarmar binsarsunna imakleged, gwage-nunmaked ukbalid.
15 Ibmar-doperegwadi, geg bar gannar innikii gued.
16 An binsadii gualid: “Emide, an wegi dule-nug-nikadga gunonikid. Jerusalén-neggweburgi an-idu-dummagan-megismaladba an bur nue-binsaed-nikaa gued. Anyobi, dule-baid bela-bela nue-binsaed-nikaa, bela ibmar-wisi megdisulid.
17 ”An ulubgi bela-bela wisgubigualid, nue-binsaed-nikaguedi, wede ibi obarleye. Deginbali, an magar-itobiguarbalid, binsaedsuli-ibmar-imaklegedi, wede ibi obarlebarye, degi, yogasaar-sunmaklegedi, ibi obarlebarye.
18 Napiragwa, ar bela-bela nue-binsaed-nikaguedi, bur bule bonigan ukbalid.