1 Womu ɡe Asɑfu u kuɑ. Ge wee.
2 Kon bɛɛ fɑɑɡi ɡɑɑ kuɑ kɑ mɔnnu ye yɑ sɑ̃ɑ yellun ɡɑri.
3 Ye sɑ nuɑ kɑ ye sɑ ɡiɑ kɑ ye bɛsɛn bɑɑbɑbɑ bɑ sun sɔ̃ɔwɑ,
4 sɑ ǹ ye bɛsɛn bibu beruɑmmɛ.
5 U bɛsɛ Isirelibɑ, Yɑkɔbun bweseru woodɑ wɛ̃.
6 Bii be bɑ koo mɑrurɑ, ben tii bɑ koo ye ɡiɑ,
7 Sɑɑ yerɑ bɑ koo Yinni Gusunɔ nɑɑnɛ ko.
8 Bɑ ǹ mɑɑ mɔ̀ nɡe ben bɑɑbɑbɑ.
9 Efɑrɑimun bweseru te tɑ tɛnnu mɔ
10 Tɑ ǹ ten ɑrukɑwɑni yibie ye tɑ kɑ Gusunɔ bɔkuɑ.
11 Tɑ win sɔm mɑɑmɑɑkiɡii ni duɑri ni u tu sɔ̃ɔsi.
12 U mɑɑmɑɑki kuɑ ben sikɑdobɑn wuswɑɑɔ Soɑniɔ Eɡibitin temɔ.
13 U nim wɔ̃ku bɛrɑ ɡɑ kpɑɑsinɑ ɡɑ yɔ̃rɑ nɡe ɡɑnɑ,
14 Guru wii wurorɑ u derɑ tɑ bu ɡbiiye sɔ̃ɔ sɔɔ.
15 U kpenu bɛsukɑ ɡbɑburɔ,
16 U derɑ nim mu yɑrɑ kpenun di,
17 Adɑmɑ kɑ mɛ, bɑɑbɑ be, bɑ wi, Wɔrukoo torɑrimɔwɑ bɑ dɔɔ.
18 Mɑ bɑ wi, Gusunɔ nɔɔ kuurɑ bɑ nùn dĩɑnu kɑnɑ ni bɑ kĩ.
19 Bɑ nɛɛ, kɑ ɡem, Gusunɔ u koo kpĩ u sun diisiɑ ɡbɑburu mini?
20 Geemɑ, Mɔwisi u kpee te so, mɑ nim mu kokɑ nɡe dɑɑrun nim.
21 Ye Yinni Gusunɔ u yeni kpuro nuɑ,
22 Domi bɑ ǹ nùn nɑɑnɛ kue.
23 Kɑ mɛ, u ɡuru wiru woodɑ wɛ̃.
24 U derɑ dĩɑ ni bɑ mɔ̀ mɑnnɑ nu bu nɛɛyɑ sɑɑ wɔllun di.
25 U bu ye wɛ̃wɑ nɡe mɛ̀n nɔɔ bɑ kĩ.
26 Yen biru, u derɑ woo ɡɑ nɑ
27 mɑ u derɑ ɡunɔsu su sɑrɑmɑ
28 U derɑ su wɔrukɑ su tɛrie bɑɑmɑ ben sɑnsɑniɔ.
29 Mɑ Gusunɔ u bu wɛ̃ ye bɑ kĩ.
30 Adɑmɑ ye bɑ dimɔ bɑ ǹ kpɑ, dĩɑnu yibɑ ben nɔsɔ.
31 Sɑnɑm mɛyɑ Gusunɔ u kɑ bu mɔru kuɑ.
32 Kɑ mɛ, bɑ wure bɑ torɑ.
33 Mɑ Yinni Gusunɔ u bu doke bɛrum sɔɔ u ben wɑ̃ɑru nɔru koosiɑ nɡe woo.
34 Yinni Gusunɔ ù n kĩ u bu ɡo,
35 Kpɑ bu yɑɑyɑ mɑ wi, Wɔrukoowɑ u sɑ̃ɑ ben kpee bɑɑ mì bɑ rɑ kuke.
36 Adɑmɑ bɑ ku rɑ ɡem ɡere.
37 Ben ɡɔ̃ru ɡɑ ǹ kɑ nùn wɑ̃ɑ.
38 Adɑmɑ kɑ mɛ, Yinni Gusunɔ u rɑ tii nɛnɛ
39 U rɑ yɑɑye mɑ bɑ sɑ̃ɑwɑ tɔmbu.
40 Nɔn dɑbinɑ bɑ Gusunɔ seesi ɡbɑburɔ.
41 Bɑ mɑɑ wure bɑ nùn nɔɔ kuurɑ wi, wi u sɑ̃ɑ ben Yinni Dɛɛro.
42 Bɑ ǹ tɔ̃ɔ te yɑɑye tè sɔɔ u bu wɔrɑ yibɛrɛbɑn nɔmɑn di kɑ win dɑm.
43 Bɑ ǹ mɑɑ yɑɑye sɔm mɑɑmɑɑkiɡii ni u kuɑ Eɡibitiɔ kɑ Soɑnin ɡberu kpɑɑnɛɔ.
44 U Eɡibitiɡibun dɑɑnun nim ɡɔsiɑ yɛm,
45 U derɑ ɡbɑbu swɛ̃ɛ yi bu wɔri yi di.
46 U derɑ twee yi ben dĩɑnu wɔri yi di.
47 U derɑ ɡuru kpenu nu ben resɛm ɡbɑɑnu kɑm koosiɑ.
48 U derɑ ɡuru ɡbɑ̃ɑ kɑ ɡuru kpenu ben yɑɑ sɑbenu di.
49 Mɑ u kɑ Eɡibitiɡii be mɔru seewɑ kɑ dɑm u bu nɔni sɔ̃ɔwɑ.
50 U ǹ dere win mɔru yu ɡoo sɛ̃ɛnɑ.
51 U Eɡibitiɡibu be, be bɑ sɑ̃ɑ Kɑmun bibun bweserun bii tɔn durɔ ɡbiikoo bɑɑwure ɡo,
52 U derɑ win tɔmbɑ yɑrɑ nɡe yɑ̃ɑ ɡɔ̃ɔ ɡe ɡɑ yɑrimɑ ɡɔ̃run di.
53 U bu kpɑrɑ kɑ bɔri yɛndu, bɑ ǹ diirɑ.
54 Mɑ u kɑ bu dɑ win tem dɛɛrɑmɔ,
55 U bwese tukunu ɡirɑ win tɔmbu Isirelibɑn sɔ̃.
56 Adɑmɑ bɑ Gusunɔ nɔɔ kuurɑ.
57 Bɑ Gusunɔ dɛsirɑri, mɑ bɑ kuɑ nɑɑnɛ sɑribɑ
58 Bɑ win mɔru seeyɑ kɑ ben bũu turɑnu.
59 Ye Gusunɔ u ye kpuro wɑ, yerɑ win mɔru seewɑ,
60 U sɑ̃ɑ yee te deri te tɑ wɑ̃ɑ Siloɔ.
61 Mɑ u derɑ yibɛrɛbɑ bɑ win woodɑn kpɑkororu mwɑ,
62 U kɑ win tɔmbu mɔru kuɑ,
63 U derɑ ɑluwɑɑsibɑ bɑ dɔ̃ɔ mwɑɑrɑ,
64 U derɑ bɑ ben yɑ̃ku kowobu ɡo tɑbu sɔɔ kɑ tɑkobi.
65 Yerɑ Yinni Gusunɔ u seewɑ nɡe tɔnu wi u dom yɑndɑmɑ.
66 Mɑ u win yibɛrɛbɑ so u ɡirɑ.
67 U Efɑrɑimu Yosɛfun biin bweseru yinɑ.
68 Yudɑn bweseru kɑ Siɔnin ɡuurɑ u kĩɑ u ɡɔsɑ.
69 Guuru miyɑ u win sɑ̃ɑ yeru bɑnɑ
70 U Dɑfidi ɡɔsɑ u n kɑ sɑ̃ɑ win sɔm kowo.
71 u kɑ ko Isirelibɑ, Yɑkɔbun bweserun kpɑro
72 Dɑfidi wi, u tɔn be kpɑrɑwɑ kɑ ɡɔ̃ru dɛɛrɔ, kɑ lɑɑkɑri.