1 Womu ɡe Dɑfidi u wom kowobun wiruɡii kuɑ kɑ mɔrɔku. U ɡu kuɑwɑ u kɑ keu sɔ̃ɔsi.
2 Womu ɡe, Dɑfidin tɑbɑ ɡɑ kɑ yɑ̃ bi u kɑ Siriɡii be bɑ wɑ̃ɑ Mɛsopotɑmiɔ kɑ Sobɑɔ kuɑ. Ye Dɑfidi u tɑɑ bi wee, win tɑbu sunɔ Yoɑbu u Edɔmun tɑbu kowobu ɡowɑ nɔrɔbun subɑ wɔkurɑ yiru (12.000) wɔwɑ ɡɑɑ sɔɔ ye bɑ mɔ̀ Bɔru. Womu ɡe wee.
3 Gusunɔ, wee ɑ sun yinɑ mɑ ɑ sun yɑrinɑsiɑ.
4 A derɑ tem mu yĩirɑ mɑ mu bɛsikirɑ.
5 A derɑ wunɛn tɔmbɑ nɔni sɔ̃ɔrɑ,
6 Be bɑ nun nɑsie, berɑ ɑ wunɛn ɡidi bɔrɑ wɛ̃,
7 A sun wɔro kɑ wunɛn dɑm.
8 Gusunɔ u ɡeruɑ win sɑ̃ɑ yee dɛɛrɑrɔ u nɛɛ, u koo nɑsɑrɑ wɑ.
9 Wiyɑ u Gɑlɑdi mɔ. Wiyɑ u mɑɑ Mɑnɑse mɔ.
10 Adɑmɑ Mɔɑbu yɑ sɑ̃ɑwɑ win woburutiɑ.
11 Wɑrɑ u koo kɑ mɑn dɑ wuu ɡbɑ̃rɑruɡuu ɡen mi.
12 Yinni Gusunɔ, wunɑ kɑɑ kɑ mɑn dɑ, wunɛ wi ɑ rɑɑ sun yinɑ,
13 A sun somiɔ su kɑ yɑri nɔni swɑ̃ɑrun di.
14 À n wɑ̃ɑ kɑ bɛsɛ, sɑ ko kpĩ su tɑbu ko kɑ wɔruɡɔru.