1 Jepe tomo, etatoko zae omi Ritonõpo ehtoh poko,
2 Zae omi ekarõko ase oya xine, tuaro ehtoh poko,
3 Morohne totase yna a,
4 Morohne ononẽpyra sytatose kypoenõkomo a,
5 Tõmihpyry tokarose eya Izyraeu tomo a,
6 inyripotyã waro ipakomotyã ehtohme,
7 Morara ahtao ynaroro Ritonõpo enetupuhnõko
8 Morarame tytamurukõ sã pyra exĩko mã toto,
9 Eparaĩ tomo, orutua komo typyreke
10 Ritonõpo a tõmiry totapose Izyraeu tomo a.
11 Tuenikehse toh kynexine inyrityã kurã poko
12 Toto tamuru tõ neneryme, tynyrityã tyrise Ritonõpo
13 Tuna konõto tapiakase eya,
14 Saereme ahtao, tarose toto eya akurũ ke,
15 Topu tõ konõto tyrakase eya ona tonorẽ po,
16 Iporiry tõ enatyry tonehpose eya topu wino,
17 Yrome popyra ehtoh poko ro kytamurukõ
18 Typoe xine Ritonõpo tukuhse eya xine,
19 Tykerekeremase ynororo eya xine, ynara karyke:
20 Ajohpe pyra topu konõto totapase eya,
21 Morara exiryke morara kary
22 Tosẽkõme onenetupuhpyra toto exiryke,
23 Mãpyra tõturuse Ritonõpo akuru htae kapu a
24 Tiriiku risẽ panõ tonehpose eya kapu aeino,
25 Naeroro kapuaõkõ napyry tonahse ahno a,
26 Morarame xixi tũtatoh wino tyryrykane
27 Ahno tõ pona torõ tõ tuhke toepukase
28 Torõ tõ toepukase ahno esary rãnaka,
29 Naeroro tõtuhse toto, tuesapare toehse toh
30 Yrome otuhnõko ro toto ahtao tuesapare pyra ro
31 toto zehno toehse Ritonõpo kynexine,
32 Moromeĩpo tyyrypyrykõ poko ro
33 Morara exiryke tonahkase toto eya,
34 Yrome toitoine totapase toto ahtao eya,
35 Mame wenikehpyra toehse toto towomanekõme
36 Toepyrypase rokẽ ynaroro repe tõmirykõ ke,
37 Zae pyra toh kynexine ikurohtao xine
38 Yrome typoetory tõ wãnopyry
39 Wenikehpyra toehse ynororo,
40 Tuhke rokẽ Ritonõpo omipona se pyra toh
41 Tuhke rokẽ tukuhse ynororo eya xine, tãkye pyra Ritonõpo, Izyraeu tõ Esẽ Kurã, tyripose eya xine.
42 Tuenikehse toto ijamitunuru imehxo ehtoh poko, typynanohtopõpyrykõ poko roropa eya tyzehnotokõ winoino,
43 inyrityã poko roropa tyjamitunuru ke ona Zoã po Ejitu nonory po.
44 Moroto tuna tõ tyripose eya munume,
45 Moromoro tuhke akurũ sã tonyohse eya,
46 Taparara tõ roropa tonyohse eya
47 Konopoimo ke tũporẽ sã topuxikiri samo,
48 Toto eky tõ pui tomo te, kaneru tõ roropa
49 Tutuarimanohpose toto eya zehno toexiryke,
50 Toto zehno toehtoh onymynyhmãkapopyra
51 Emero tapyi tao apitoryme aenurutyã totapase
52 Moromeĩpo toky tõ kaneru pyno exikety sã,
53 Tarose toto eya, toto ewomaryme
54 Izyraeu tõ tarose Ritonõpo a tynonory kurã pona,
55 Moro nono põkõ taropose eya moro nono poe,
56 Yrome Ritonõpo tukuhse eya xine,
57 toeramase toh kynexine ewinoino,
58 Tyryhpopãkase sã ynororo eya xine apoto apõ
59 Morohne eneryke tyya, tyekĩtapãse Ritonõpo
60 Tytapyĩ kurã turumekase eya Xiro po,
61 Tõmihpyry ẽ tapoipose eya Izyraeu tõ
62 Typoetory tõ zehno toehse ynororo,
63 Nuasemãkõ totapase tõsetapary poko toto ahtao,
64 Ritonõpo maro oturuketõ roropa totapase kynexine,
65 Morarame Ritonõpo typakase ropa, nyhxĩpo samo,
66 Topetõkara typoremãkapose eya, toepase toto,
67 Joze pakomotyã turumekase eya,
68 Yrome Juta tõ tymenekase eya,
69 Tytapyĩ Kurã tyrise eya, tytapyĩ samo kapu ao,
70 Mame typoetory Tawi tymenekase Ritonõpo a,
71 kaneru tõ poko aerokuruhtao ro.
72 Tomeseke sã Izyraeu tõ pyno Tawi kynexine,