1 Ritonõpo yna Esemy, wenikehpyra exiko yna ryhmatopõpyry poko;
2 Yna nonory tapoise imepỹ nono põkomo a;
3 Poetõpome ynanase, yna zũ tõ totapase exiryke zehnotokomo a;
4 Tuna se yna ahtao, epekahnõko ynanase yna okurume;
5 Yna rohmanohpõko mã toto yronymyryme jumẽtu samo, kameru sã roropa,
6 Tonahsẽ nae yna ehtohme isene ro yna ehtohme,
7 Yna tamuru tõ iirypyryme toehse toh nexiase,
8 Yna tuisary tõ imehnõ namotome erohnõko mã toto.
9 Imehnõ etapananõ ytoytõko yna nonory poro.
10 Omise yna exiryke oxirohnõko ynanase,
11 Yna pyxiã tyyryhmase pata Jerusarẽ po ro, yna ẽxiry tõ oryximãkõ roropa, emero pata tõ po Juta nonory po.
12 Zehnotokomo a yna tuisary tõ tõsexihse wewe pokona;
13 Yna poenõ tyrohmanohpose mã toto yronymyryme erohtoh tupime exikety poko.
14 Tamuhpomãkõ oximõpyra toehse mã toto pata omõtoh tao,
15 Tãkye ehtoh toepase mana yna kurohtae.
16 Yna epyrypatopõpyry emero tonahkase ipunaka,
17 Yna kurohtao kure pyra ynanase,
18 Ypy Xião turumekase exiryke, raposa tõ ytoytõko mã toto typahsã poro.
19 Omoro, Ritonõpo, tuisame oehtoh jũme exikehpyra mana, ahno poenõ pona te, ipakomotyã ponãmero roropa.
20 Oty katoh yna murumekase okynahxo?
21 Yna iramapoko ropa oya, Ritonõpo.
22 Otarame jũme turumekase yna oya?