1 Ritonõpo a juãnopyry waro ase, sam tykamexipose jexiryke eya, zehno ahtao.
2 Jaropoase ynororo ikohmamyry aka,
3 Tomary ke typitypipohse ywy eya ikohmamyry pona.
4 Kynykynyme upũ tyripose eya,
5 Jomye apuru tyrise eya,
6 Xinukutumã aka tyripose ywy eya koko samo, aorihtyã sã jehtohme okynahxo.
7 Keti ke tymyhse exiase omoxinety ke Ritonõpo a;
8 Kohtãko ase jakorehmatohme repe,
9 Ytosaromepyra ase;
10 Reão sã jeraximãko Ritonõpo mana,
11 Jesemary poe taropose ywy eya,
12 Taky tapoise eya,
13 Moro pyrou tõ, Ritonõpo nuotyã mya tomõse kehko nexiase upũ aka.
14 Ahno ypoihtory poko kohmãnõko mã toto;
15 Tonahsẽ itunety ke tynahpase ywy Ritonõpo a ise pyra jehtoh ke,
16 Jẽmyty tõsykysykymapose eya nono poro,
17 Sekese jehtoh waro pyra toehse ywy,
18 Okynã pyra orihnõko ase;
19 Wenikehpyra ase jemynyhmary poko, toiroro jehtopõpyry poko, sam katoh poko ya te, jetuarimatopõpyry poko roropa.
20 Morohne poko osenetupuhkehpyra ase,
21 Yrome jakorehmary Ritonõpo a eraximapitõko ropa ase ynara josenetuputyryhtao ya rokene:
22 Kypyno xine Ritonõpo ehtoh enahpỹme mana.
23 Moro kypyno xine aehtopo te, kure aexiry roropa kasenatome mana ẽmepyry punero.
24 Ypyno exiketyme Ritonõpo mana.
25 Kure Ritonõpo mana Tosẽkõme enetupuhnanomo a emero.
26 Naeroro kurehxo mã kure ehtoh eraximary kyya xine,
27 Kure mã moro penekehpyra ehtoh waro toehse ahtao poetome ro kuahtao xine.
28 Sam tykamexipose kuahtao xine Ritonõpo a, kure toiroro kuexirykomo, tehme roropa, penekehpyra kuehtohkõme.
29 Osenetaonohpyra sehtone Ritonõpo neneryme,
30 Typoihtose kuahtao xine onezuhpyra sehtone,
31 Iirypyrymãkõ wãnopyry se pyra Ritonõpo mana, jũme kurumekara xine mana.
32 Emynyhmatoh enehporyhtao ro kyya xine kypyno xine ro mana yronymyryme, kypyno xine aehtoh jamihme mana.
33 Sam kamexipory se nymyry pyra mana,
34 Ritonõpo zuaro mana ãpuruhpyry taõkõ tyyryhmase ahtao Izyraeu nonory po;
35 Ritonõpo Imehxo Exikety zuaro mana zae pyra imehnõ riryhtao kyya xine,
36 Zuaro Ritonõpo mana zae pyra kuomirykõ ahtao imepỹ poko apiakane ẽpataka.
37 Tyriry se kuehtohkõ onyrisaromepyra sytatose tyripory se pyra Ritonõpo ahtao.
38 Kure ehtoh exĩko mana, popyra ehtoh roropa exĩko, Ritonõpo, Imehxo Exikety omi poe.
39 Onykerekeremara ehtoko, tuãnohse awahtao xine oorypyrykõ emetakame.
40 Kynyrihpyrykõ senetone, sosenetupuhtone
41 Soturutone Ritonõpo a Kapuaono a, ynara sykatone:
42 “Ritonõpo, iirypyryme toehse ynanase.
43 “Yna zehno toehse mexiase, yna tokahmase,
44 Akurũ ke sã yna zehno oehtoh ke tãtapuruse mase yna otururu oya onetara oehtohme.
45 Yna tonepose oya imehnõ nonory põkomo a,
46 “Yna eunohnõko mã toto yna epetõkara, emero.
47 Tonaroxitapãse yna,
48 Xitãko ase, jenuru tõ ae iporiry yhtõko, yxity, wekyry tõ enahkaryke.
49 Xitakehpyra jenuru tõ mana anorypyra roropa,
50 Ritonõpo osenuhmatoh pona kapu poe yna enetohme.
51 Atasamãko ase ukurohtao josenetuputyryhtao nohpo tõ poko.
52 Jepetõkara, popyra ehtoh onyripyra jahtao eya xine urakanase toehse mã toto juotohme torõ pitiko samo.
53 Jẽmase toto eutary aka, isene ro,
54 Tuna tõnuhse jupuhpyry epozakoxi:
55 Moro eutary ae tykohtase ywy jakorehmapotohme oya, Ritonõpo.
56 “Ajohpame sã jomiry etako!” tykase jahtao oya,
57 Mame tozuhse ywy oya:
58 Ritonõpo, moepyase jakorehmase,
59 Ritonõpo, zae jepetõkara apiakako,
60 Yzehno mokaro ehtoh waro mase,
61 Ritonõpo Jesemy, jeunohtopõpyry eya xine totase oya,
62 Ykerekeremary poko kohmãnõko mã toto,
63 Mokaro enẽko mase,
64 Ritonõpo, mokaro epehmako zae rahkene,
65 Popyra ehtoh enehpoko mokaro pona.
66 Ekahmako toto, Ritonõpo, toto zehno oehtoh ke,