1 “Oty katohme ẽmepyry onymenekara Ritonõpo Jamihmehxo Exikety nae ahno apiakatohme, zae ehtoh ekarotohme typoetory tomo a?
2 Ahno nae tosary ehpio menuru syryhmãko zumohxo tynonory ritohme.
3 Jumẽtu tõ arõko mã toto poetõpo tõ eky tomo,
4 Tymõkomokãkara onewomara mã toto,
5 “Tytineruke pyra exiketõ, jumẽtu tõ tosẽke pyra exiketõ sã,
6 Tytineruke pyra exiketõ toerokurukõ se mã toto popyra exiketõ poetoryme, uwa tõ epery apoiry poko.
7 Tãtyke pyra mã toto oxiõtotohme koko,
8 Ypy tõ po tohxikasẽme exĩko mã toto, konopome ahtao,
9 Poetõpo tõ pitiko apoĩko popyra exiketõ mana, tynamotome toto ritohme.
10 Tupoke pyra exisasaka ytoytõko mã toto tupoke pyra toexirykõke,
11 Azeitona tõ akurihmõko mã toto azeite ritohme,
12 Tapurose aexityã, orihsasaka exiketõ roropa kohtãko mã toto tãtakorehmapotohkõme repe.
13 “Popyra exiketõ saereme ehtoh se pyra mã toto.
14 Ahno etapane owõnõko mana tõmehse ahtao tytineruke pyra exiketõ etapatohme.
15 Imeimehnõ nohpo poko exikety kokonie pukuro eraximãko
16 Koko, imehnõ tapyĩ taka omõnõko omato kõ mana.
17 Saereme ehtoh zuno mã toto.
18 “Popyra exiketõ tarosẽme exĩko mana tuna zueme exikety a.
19 Newe tuname exiry sã xixime ahtao, axitũ toehse ahtao, moro sã iirypyryme exiketõ tonahkasẽme exĩko isene exiketõ nonory po.
20 Mokaro poko wenikehnõko jẽkõ roropa mana.
21 Morohne exĩko mana pytỹpo tõ anakorehmara toto exiryke, nohpo tõ emũkuahno pyno pyra roropa aexirykõke.
22 Tyjamitunuru ke popyra exiketõ enahkapõko Ritonõpo mana;
23 Imehnõ ewomãko Ritonõpo mana isene ro,
24 Axĩtao rokẽ orẽpyra exĩko popyra exiketõ mana.
25 Onoky sero jomiry zae pyra ekarõko nae?