1 Mame Jo a tozuhse. Ynara tykase ynororo:
2 “Oty katohme jyhtomãko matou?
3 Tuhke rokẽ typoihtose ywy oya xine.
4 Azahkuru jahtao ro, otãto oryhmatorỹko hano?
5 Ymotye kure osekarõko matose.
6 “Tuaro ehtoko zae pyra Ritonõpo toehse ypoko.
7 Kohtãko ase, yyryhmara Ritonõpo ehtohme.
8 Jesemary tapuruse eya, ytopyra jehtohme.
9 Ymõkomory emero tupuxihkase eya,
10 Ypipohnõko mana emero rokẽ poe jenahkatohme.
11 Yzehno toehse ynororo, tyahse sã ywy;
12 Tysoutatu tõ tonehpose eya etonatohme ymaro.
13 “Turumekapose ywy Ritonõpo a wekyry tomo a.
14 Wekyry tomo a turumekase ywy,
15 Ytapyĩ tao tynyhse aexityã juaro pyra sã mã toto;
16 Ypoetory kohmãko ase repe onetara mana,
17 Ỹtary tymoke mana ypyty a, typoxine pyra;
18 Poetohti tõ yse pyra mã toto;
19 Jepe tõ mã yse pyra ipunaka,
20 Ipihpyryme rokẽ toehse ywy tupunatãse.
21 Oenupunako ypoko, jepe tomo, Ritonõpo a tapurose jexiryke.
22 Oty katohme yyryhmãko matou, yyryhmary sã Ritonõpo a?
23 “Kure ya exiry jomiry poko wenikehpyra ahno ahtao,
24 Kure roropa exiry jomiry tymerose ahtao kurimene ke xũpu pokona te, topu pokona roropa, jũme ehtohme!
25 Ynara zuaro ase: Jewomane isene mana;
26 Ypihpyry tonahkase ahtao ro tyrohsẽ ke,
27 Ywy roro jenuru ke nymyry mokyro enẽko ase,
28 Typoremãse exiase ynara karyke oya xine:
29 Yrome Ritonõpo tapemã zuno ehtoko.