1 Ilu' inRyosil, na waj yil tzinjak jun wajbil teru'.
2 bantz sk'il cunin cawun i' skibaj yi o' tanumu', nin squibaj cyakil yi e' tal prow yi at tajwe'n scyetz.
3 Tan tu' yi chin sk'il cunin yil cawun i', lok jal tzatzin paz bene'n tzi'n.
4 Lok xom wi' i' scye'j yi e' tal prow me'ba'.
5 Ej nin yi wajbil i'tz: yi nink tek ẍchi' yi kareyil yi teru' ca'wlu'.
6 Cho'nk tz'an yi cawun i', chi na ban yi a'bal, yi na cu' bene'n tzi'n, nin yi na xcye' tan tac'se'n cyakil e'chk ama'l.
7 Nink jal tzatzin paz te yi tiemp yil cawun i'.
8 Nin yil cawun i', nink tz'opon cu'n yi ca'wl jalen tzi mar, nin jalen te yi wutzile'n tzanla' Eufrates, nin bene'n tzi'n wi munt.
9 Ej nin cyakil yi e' tetz contr, yi ate' le e'chk ama'l tz'inunin tu', nink cho'c jak' ca'wl i'.
10 Chu'l cyakil yi e' bajxom tan toye'n, nin tan ẍchojle'n alcawal tetz yi kareyil.
11 Tajwe'n chimeje' yi e' mas rey swutz yi ketz kareyil.
12 Na i' tz'ocopon tan quich'eye'n yi tal prow yil cu' chiwutz tetz.
13 Tz'el pon k'ajab scye'j yi e' tal prow yi qui'c nin ate't cu'nt.
14 Tz'elepon k'ajab scye'j yi e' yi buchijche'.
15 Kak'e' bin k'ej yi kareyil.
16 Nin ncha'tz lok jal wi'nin ixi'n triw.
17 Nink ben ẍkon yi tiemp yi kareyil tan cawune'n tzone'j.
18 Kak'e' bin k'ej yi kaRyosil, yi ketz kaRyosil yi o' xonl Israel.
19 Kak'e' bin k'ej yi tetz bi' tetz ben k'ej ben sak.
20 Cho'n na tzaj wi' yi e'chk oración yi rey Luwiy tzone'j, yi jun Luwiya'tz yi cy'ajl Isaí.