1 Siwl Ta', elk k'ajabu' swe'j.
2 Tcy'ajlenu' yi yab ajtza'kl yi cy'a'n wa'n.
3 Wajcaw, na el intxum tetz yi in jun chin wi'tz pajol ca'wl swutzu'.
4 Ja injuch wil swutzu' Ta'.
5 Ta', na el intxum tetz yi in jun juchul il jetz yi witz'le'nix.
6 Poro yi teru' Ta', na tzatzinu' scye'j yi e' yi skoj cu'n te cyalma'.
7 Chin xansaju' tan hisopo, bantz stzaje'n yi wil.
8 Tak'u' junt tir yi tzatzin swetz, na na waj yil chintzatzin, ptzun jajk chin cawsaju'.
9 Qui'k tz'ocu' tan xtxumle'n yi wil.
10 Wajcaw, lok xtx'ixpuju' wajtza'kl.
11 Qui'k chin jatxlenu' te'ju'.
12 Ma na ẍchaje'u' swetz yi ẍe'nk chintzatzin junt tir, yi ẍe'nk tz'el intxum tetz yi ja chinclax.
13 Na yi wajbil i'tz tan inxcone'n tan chichusle'n yi e' pajol ca'wlu', bantz chixome'n te yi teru' tajbilu'.
14 Ta', qui't tak'u' junt tir ama'l swetz tan woque'n tetz biyol nak.
15 Wajcaw, ẍchaje'u' puntil swetz tan wuk'ol ink'ajsbil swutzu'.
16 Na na el intxum tetz yi qui na taju' e'chk oy, nka e'chk tx'ixwatz yi na kapat swutzu'.
17 Poro yi teru' tajbilu' i'tz yi nink kabisun tan kil, nin yil kocsaj kib juy swutzu'.
18 Wajcaw, elk k'ajabu' te Sión yi tanumu'.
19 Na ko na kabisun tan kil, jun cu'n stzatzinku' te yi koy tu e'chk katx'ixwatz yil kapat swutzu'.