1 Ma jalu' kaRyosil, ja kubit yi mbi cu'n banaku' tenẍchan.
2 Na ilu' mmak'on chicaws yi e' mal nak.
3 Na ilu' ak'on ama'l scyetz kamam kate' tan cyetzal yi e'chk ama'la'tz.
4 Ilu' kaReyil, ilu' kaRyosil, na el katxum tetz yi ilu' mmak'on ama'l scyetz kamam kate' tan chixcyewe'n te chicontr.
5 Ncha'tz mbanu' ske'j ketz, na tan ilu' nkaxcyewe't scye'j yi e' ketz kacontr.
6 Cha'stzun te, yi in wetz, qui na k'uke' inc'u'l te yi e'chk inma'cl, chi tane'n yi c'oxbil inflech nka chi tane'n weri inspar.
7 Na ilu' nkacolon ẍchik'ab yi e' kacontr.
8 Cha'stzun te, ilenin skak'e' k'eju'.
9 Poro lastum, ja ke'l te c'u'lu' Ta', na ja tak'u' ama'l tan tele'n katx'ix.
10 Ja tak'u' ama'l scyetz kacontr tan chixcyewe'n ske'j, na ja ke'l ojk ẍchiwutz.
11 Ja tak'u' ama'l scyetz kacontr tan kabiyle'n, chi na ban jun tal cneru' yi na ben tk'ab biyol tetz.
12 Ja ko' ben c'ayilu'.
13 Ja ko'c tetz chiyolbe'tz cyakil wunak.
14 Na ja tak'u' ama'l scyetz yi e' awer nak tan cyoque'n tan kayolche'n.
15 Qui'c nin jun tkuj yi qui'k na katx'ixwij.
16 Poro i'tz tan chipaj yi e' kacontra'tz, yi na chitzan tan kabuchle'n nin tan kayolche'n.
17 Ya'stzun kutane'n ẍchik'ab.
18 Na qui'c na katxum tan cyaje'n cyen kilolu'.
19 Poro yi ilu' teru' ja tak'u' ama'l tan kele'n cu'n swutz.
20 Ma jalu' Ta', yi nink me'lu' te kac'u'l
21 Ja klo' tilu', na yi ilu' teru', na tilu' cyakil yi mbi na icy' tkac'u'l.
22 Poro cyakil yi e'chk takle'na'tz yi ja ul skawutz, i'tz tan paj yi xomcho' te'ju'.
23 Ma jalu' Ta', qui't tak'u' mas ama'l te yi e'chk takle'na'tz, ma na elk k'ajabu' ske'j.
24 Quil ko' til cyenu'. Quil tew tibu' skawutz.
25 Junawes ja ke'l cu'n swutz, na ja wi't ko'c jak' chica'wl yi e' kacontr.
26 Sajk binu' tan kuch'eye'n.