1 Quil cxbisunwok tan yi e'chk takle'n cachi' yi na chiban yi e' mal nak.
2 Quil cxbisunwok tan paj, na ni'cu'n sbajok scye'j chi na ban jun buch yi jalcu'n na skej tan k'ej.
3 Ma na k'ukek itetz ic'u'l te Kataj.
4 Joywok yi tzatzin yi na jal te Kataj.
5 C'oxwok itib junawes tk'ab i'.
6 Slajluchaxk tzun yi jicyuch te itajtza'kl.
7 Pasens na taj tan ẍch'iwe'n yi tajbil Kataj.
8 Quil tzitak'wok ama'l tetz jun bis, nka jun chi'ch c'u'lal, tan wane'n tzite'j.
9 Quil tzibanwok e'chk takle'na'tze'j.
10 Txant tan chisotze'n yi e' mal naka'tz.
11 Poro yi e' c'ulutxum, ẍchinajank cyera'tz tul chi'ama'l.
12 Ma yi e' mal nak, ilenin na cho'c tan xtxumle'n yi mbil chiban scye'j yi e' balaj.
13 Poro yi Kataj tze'e'n tu' na ban i' scye'j yi e' mal naka'tz, na na el xtxum tetz yi ẍchisotzok cyera'tz.
14 Yi e' mal naka'tz list quitane'n tu chispar tu c'oxbil chiflech tan chibiyle'n yi e' prow, yi e' yi at tajwe'n scyetz.
15 Poro ite'n nin chispar xconk tan chibiyle'n cu'n.
16 Yi mu'ẍ tal chime'bi'l yi e' me'ba', mas ba'n tcu'n swutz cyakil chime'bi'l yi e' ric.
17 Na tz'ocopon Kataj tan chixite'n yi e' mal nak.
18 Na na oc i' tan chicolche'n yi e' yi qui na chijuch quil.
19 Ej nin yil tz'ul c'a'laj tiemp ẍchiwutz, quil chitij q'uixc'uj.
20 Poro yi e' mal nak ẍchiquimok cyera'tz.
21 E' c'amol pwok poro qui't na chichoj.
22 Yi e' yi at banl Kataj squibaj,
23 I' na chajon chibe' yi e' balaj.
24 Kol chisaj trimp, quil chicu' trimp junawes, na at nin Kataj tan chixicyle'n.
25 Yi in wetz ja chintijin.
26 Yi e' balaj naka'tz, ilenin na el chik'ajab scye'j yi e' mas wunak, nin tzatzin cu'n na cyak' c'mo'n scyetz.
27 Cyajswok cyen e'chk yab ajtza'kl.
28 Na yi Kataj na pek' te e'chk balaj ajtza'kl.
29 Ma yi e' balaj nak, scyetzaje' yi ama'l.
30 At xtxolbil chiyol yi e' balaj.
31 At nin yi ca'wl Kataj te cyalma'.
32 Ma yi e' mal nak na cho'c tan chixk'uke'n yi e' balaj, nin na chijoy puntiltz tan chibiyle'n cu'n.
33 Poro quil tak' Kataj ama'l scyetz.
34 K'ukek bin ic'u'l te Kataj.
35 Wilnak jun yaj yi chin juntlen nin yi tajtza'kl.
36 Poro yi xone'n tiemp ja nicy'ak tan tilwe'n, poro qui'ct i' at.
37 Poro ilwok nin yi e' balaj.
38 Ma yi e' pajol ca'wl, chixitok cyera'tz.
39 Na yi Kataj at i' tan quich'eye'n yi e' balaj.
40 Na oc i' tan quich'eye'n, tan cyele'n liwr ẍchik'ab yi e' mal nak, na cho'n na cu' chiwutz tetz i' tan chiclaxe'n.