1 Nži'ila' Le', X̱ana' Dios.
2 Le', X̱ana' Dios, nako' ka to yej gan zoa' choch,
3 Ẕnnia': X̱anžo Dios žaḻa' wká'n ẕenžo-ne'.
4 Wzóa' ḻo da' zede che yeḻa' got,
5 Gota' ẕož chia' choa'a ḻo yi' gabíl
6 Ḻo da' ẕžia yin' benách ka' bḻiža' X̱ana' Dios
7 Naž wẕó' yežlyó nga.
8 Bžoj žen che yi' ḻo ẕine'e,
9 Bsaljwe' ya'abá, na' betje',
10 Wdíe' ḻo be', ne ži'e to da' nzin' kerubín.
11 Gokwe' da' choḻ, dan' bkachen' Ḻe',
12 Ḻo da' žákti'teḻe'e chie' bžojgak bejw gasj ka'.
13 Ẕan ya'abá wnné wzió' che chi'i X̱anžo Dios,
14 Bsie' yag ntóche'do' chie' ka',
15 Naž bḻa' ḻawgak da' ka' zej že' gže' ẕan nisdo',
16 Betj Dios ḻo da' sibe, na' bex̱we' neda',
17 Beslé' neda' ḻo na'gak benne' waḻe ka', benne' bi ẕḻé'egekle' neda' chawe',
18 Bdíḻ-ḻengake' neda' katen' wzóa' ḻo da' zedḻe'e,
19 Bebeje' neda' gan wyoá'a, na' bzoe' neda' to latje ẕen.
20 X̱anžo Dios bebi'e chia' dan' bena' da' naken chawe',
21 dan' žona' ka žsedle X̱ana' neda',
22 Žona' ka nak da' bchi'le' žo'o,
23 Goka' ḻi ḻaže' ḻawe' Ḻe',
24 Bebí'i X̱anžo Dios chia' ka nak da' chawe' da' bena',
25 Žeyache' ḻáže'lo' no benne' žeyache' ḻáže'le' lježe',
26 Ẕcháḻjḻeno' benne' chawen' da' naken dot chawe',
27 Yesló' benne' chawen' ḻo da' wžía yin' benách ka',
28 Le' wzaljo' yi' chia'.
29 Yeḻa' wak chio' wžía yin' benne' zanḻe'e, benne' ka' žjake' ḻo wdiḻe.
30 Da' ka' žon Dios zej naken ḻi ḻaže', na' x̱tiže'e naken dot da' li.
31 Toze X̱anžon' nake' Dios.
32 Dios nake' Bennen' žone' neda' benne' waḻe,
33 Žone' ni'a ka zej nak ni'a bžina' yix̱e'
34 Žsedle' neda' nich gak cha'a ḻo wdiḻe,
35 Ḻo yeḻa' žeslá chio' wdape chi'o neda', na' ḻen no'o ḻi ža gókḻeno' neda'.
36 Ben chawo'o nez gan tia',
37 Bsejwa' x̱nezgak benne' ka' ẕžá'agake' neda', na' bena' ga bẕónnjgake',
38 Bena' benne' ka' we', na' bi gok yeyásgake'.
39 Ben chocho' neda' nich gok cha'a ḻo wdiḻen'.
40 Beno' bẕonnjgak ḻawa' neda' benne' waḻe ka',
41 Wnnábgekle' no benne' gákḻene' ḻégake' san bi wzóa no benne'.
42 Bžia yi'a benne' ka', na' gókgake' ka bix̱te yo dan' ẕzen ḻo be'.
43 Besló' neda' ḻo na'gak benne' ka' ẕží'igake' chia',
44 Kate' béngekle' chia', na' béngake' kan wnnía'.
45 Benne' zi'to' ka' gotgak ni'a ná'gake'.
46 ¡Ga'n ẕen X̱anžo Dios!
47 Dios žebéj yichje' benne' ka' ẕžá'agake' neda',
48 Žeslé' neda' ḻo na'gak benne' ka' ẕžá'agake' neda'.
49 Wká'n ẕena' Le', X̱ana' Dios, ḻawgak benne' yež ka',
50 Žono' ga žon to benne' da' ẕen ka',