1 ¡Le wká'n ẕen X̱anžo Dios, Benne' chawen'!
2 ¡Le wká'n ẕen Dios, Bennen' nákḻe'eže' ẕen ka zej nak dios chegak benne' zi'to' ka'!
3 ¡Le wká'n ẕen X̱anžon', dan' nákḻe'eže' ẕen ka zej nak x̱angak benne' zi'to' ka'!
4 ¡Le wká'n ẕen toze' Ḻe' dan' žone' yeḻa' wak ẕen ka'!
5 ¡Le wká'n ẕen Ḻe', dan' benkze' ya'abá ḻen yeḻa' žejní'il chie'!
6 ¡Le wká'n ẕen Dios, Bennen' bzoe' yežlyó ḻawle nisdo'!
7 ¡Le wká'n ẕen Dios, Bennen' bene' wbíž, na' byo'!
8 Bene' Ḻe' wbíž nich wsa'nín' te ža.
9 Bene' byo', na' belj ka' nich wsa'ní'gaken žel.
10 ¡Le wká'n ẕen Dios, Bennen' bete' bi' byo nežw ka' chegak benne' Egipto ka'!
11 ¡Le wká'n ẕen Dios, Bennen' bebeje' benne' Israel ka' ḻo yežlyó Egipton'!
12 Bchi'e ḻégake' ḻen yeḻa' wak ẕen chie'.
13 ¡Le wká'n ẕen Dios, Bennen' ben chople' Nisdo' X̱na!
14 Bene' ga bdegak benne' Israel ka' gachj ḻawle nisdon'.
15 San bene' ga bkache' nisdon' Faraón, benne' wnná bi'e benne' Egipto ka', benne' ka' žjake' ḻo wdiḻe.
16 ¡Le wká'n ẕen Dios, Bennen' bchi'e benne' chie' ka' ladjw latje dach!
17 ¡Le wká'n ẕen Dios, Bennen' bete' benne' wnná bia' ka'!
18 Bete' benne' wnná bia' waḻe ka'.
19 Bete' Sehón, bennen' wnná bi'e benne' amorreo ka'.
20 Bete' Og, bennen' wnná bi'e benne' yež Basán ka'.
21 Bdie' yežlyó chegak benne' ka' ḻo na'gak benne' chie' ka'.
22 Bneẕjwen' chegak benne' Israel ka', benne' wen žin chie' ka'.
23 Žejsá' ḻaže'e žo'o kate' ẕdíḻ-ḻengak benne' ka' žo'o.
24 Beslé' žo'o ḻo na'gak benne' ka' bzéx̱jwgake' žo'o.
25 Ẕwawe' yógo'te da' zej zoan nbángaken.
26 ¡Le wká'n ẕen Dios che ya'abá!