1 X̱ana' Dios, ẕka'n ẕena' Le'.
2 dan' benne' ka' bi zej nake' chawe', na' benne' wen ḻaže' ka', ẕnnégake' chia' neda'.
3 Ḻo yeḻa' ẕža'a chégake' zej nyechjle' neda', na' ẕnnégake' chia'.
4 Ḻa'kze bži'ila' benne' ka', na'a žéchjgekle' neda', na' ẕdíḻ-ḻengake' neda',
5 Ḻa'kze bena' neda' da' chawe' chegak benne' ka', žóngake' neda' ẕia.
6 Bzoa to benne' wen da' ẕinnj nich wchi'a ḻaže'e benne' ka' bi zej nake' chawe',
7 Katen' wchi'a ḻaže'e ḻégake', ben ga gak bia' ẕia da' zej nbage'e.
8 Ben ga gakgak nbabze ža sóagake' nbángake',
9 Bka'n ẕí'ngake' ka' bi' wzebe ka',
10 Ben ga gakgak ẕí'ngake' ka' benne' ẕdágakze'
11 Ben ga cho'o da' nápegake' ḻo na' bennen' bsane' ḻégake' mežw.
12 Ben ga bi soa no benne' yeyache' ḻáže'le' ḻégake',
13 Ben ga kwia yi'gak ẕa'sógake' ka',
14 Bejsá' ḻaže' che da' ẕinnj da' bengak x̱a x̱tó'gake', X̱ana' Dios,
15 Bejsá' ḻáže'teze da' ẕinnj da' béngake',
16 dan' bi bejsá' ḻáže'gake' yeyache' ḻáže'gekle' ljéžgake' ka'.
17 Wyáz ḻáže'gake' wnnégake' chegak benách ka'.
18 Da' ẕia da' žóngake' naken ka to da' žákwgake',
19 Ben ga tá'tezen ḻégake' ka to laže' yicha' da' nákwgake',
20 Da' ni gaken chégake' to da' yebí'i X̱anžo Dios chegak benne' ka' ẕdíḻ-ḻengake' neda',
21 X̱ana' Dios, gokḻen neda' nich gak chia' da' chawe'.
22 na' dan' ẕzáka'ḻi'a, na' žiážjela',
23 Ẕde chia' kan ẕde che to ẕoḻ kate' žen wbíž.
24 Žat ẕiba' dan' žona' wbás,
25 Naka' ka to da' žon dítjgekle'.
26 Gokḻen neda', X̱ana' Dios.
27 Ben ga gákbe'egekle' Le' žákḻeno' neda',
28 Bi be žéke'la' cha' ẕnnégake' chia', cha' Le' žon chawo'o neda'.
29 Ben ga yedoé'egekle benne' ka' ẕdíḻ-ḻengake' neda',
30 Dot ḻaža'a goḻkza' da' we ḻáwḻi'a X̱anžo Dios.
31 Ḻe' zoe' kwit ḻi ža chegak benne' yache' ka',