1 ¡Le güe lá'ana Xránadxu, Benne' xrlátaje!
2 Da nigá dxal-la' xelenná benne' ca' ba naxá'awe Xránadxu le̱',
3 Beche̱'e̱ le̱' naga gulezrá' benne' xe̱zr la xu zitu' ca',
4 Bal-la benne' ca' guledé̱' le̱'e̱ xixre' naga quebe bi neza zua,
5 Guledune̱', ne gulebílene̱',
6 Nadxa lu da dxelezaque̱' gulenné̱' Xránadxu,
7 Na' buzre̱'e̱ le̱' tu neza li,
8 Dxal-la' xelúe lá'ane̱' Xránadxu lawe' da bexache lazre'
9 Dxuxí'aje̱' benne' ca' dxelebile lazre',
10 Bal-la benne' caní gulezúe̱' lu da chul-la, ne lu da ste̱be
11 lawe' da guledábague̱' xrtizra' Xránadxu,
12 Belexedú lazre̱' lu zrin zí'ite̱ da dxelune̱'.
13 Nadxa lu da dxelezaque̱' gulenné̱' Xránadxu,
14 Nadxa bebéaje̱' benne' ca' lu da chul-la
15 Dxal-la' xelúe lá'ane̱' Xránadxu lawe' da bexache lazre̱' le̱',
16 Bchínnaje̱' dxa xu'u ca' zaj naca na xia gache,
17 Bal-la benne' ca' gulaque̱' benne' xala,
18 Belexegútene̱' da dxelé'aj dxelawe̱',
19 Nadxa lu da dxelezaque̱' gulenné̱' Xránadxu,
20 Gusel-le̱' dizra' chee̱' chee̱ benne' ca',
21 Dxal-la' xelúe lá'ane̱' Xránadxu lawe' da bexache lazre̱' le̱',
22 Dxal-la' xelé̱'e̱ Le̱': Xcalenu'.
23 Bal-la benne' ca' guledée̱' lu nísadau'
24 Belelé'ene̱' ca naca da ca' dxun Xránadxu,
25 Gunné̱ze̱', na' guzú lau dxaca be' bdunu',
26 Belegüén da dxedá lawe' nísadau' ca' ca lu xi'a zri'a
27 Gulechégüe̱', ne xeajleté̱' ni xeajleté̱' na' ca
28 Nadxa lu da dxelezaque̱' gulenné̱' Xránadxu,
29 Bzua zrie̱' be' bdunu' na' da dxaca na,
30 Gulebéle̱'e̱ne̱' lawe' da zaj zua zri xeajxruza ca',
31 Dxal-la' xelúe lá'ane̱' Xránadxu lawe' da bexache lazre̱' le̱',
32 Dxal-la' xuluzenne̱' ca naca xel-la' szren chee̱' naga
33 Be̱n Xránadxu gulebizre xe̱gu nisa ca',
34 Xu xa'a bexune̱' na xu bizre,
35 Naga naca xu bizre bexune̱' na xu nisa,
36 Bzre̱'e̱ ga na' benne' ca' benne' dxeledún,
37 Gulaze̱' xe̱zr la xu na', na' belexaze̱' lba uva ca',
38 Be̱ne̱' da chawe' chee̱ benne' ca', na' gulánle̱'e̱
39 Gate buludé benne' dxelenná bea benne' ca' lu xel-la' zi',
40 bca'ana ditaj Dios benne' xíchaje̱ ca',
41 Bselé̱' benne' xache' ca' lu da zi' da xa' da dxeledée̱',
42 Gate dxelelé'e benne' xrlátaje ca' da caní, na' dxelebéle̱'e̱ne̱',
43 Benne' ca' zaj naque̱' sina dxal-la' xulaba lazre̱'