1 Rudzéjanëʼ bönniʼ rinná bëʼë tuʼ zóalen lëʼ yöl-laʼ huáca quiuʼ Liʼ, Xan.
2 Bunödzjuʼ queëʼ le rizë́ ládxëʼë.
3 Tuʼ raza ládxuʼu lëʼ ruzúʼ queëʼ yuguʼ le naca dxiʼa.
4 Gunábinëʼ Liʼ guʼu queëʼ yöl-laʼ naʼbán, ateʼ bëʼu le queëʼ.
5 Zxöntë naca yöl-laʼ zxön queëʼ tuʼ nusölóʼ lëʼ.
6 Zóaticaʼsö le naca dxiʼa nuzúʼ queëʼ.
7 Caní raca queëʼ bönniʼ naʼ rinná bëʼë tuʼ ruzxöni ládxëʼë Xanruʼ.
8 Huadeliʼ noʼo ga nacuáʼ yúguʼtë nupa taʼdáʼbagaʼ Liʼ.
9 Cateʼ idxín dza usiúdxuʼ léguequi gaca quéguequi ca tu guíʼ ruzegui blaʼdoʼ.
10 Ucuítuʼ yuguʼ zxíʼini xiʼsóagaca nupa naʼ luyú ni,
11 Caní gunuʼ tuʼ gulë́ʼëniguequinëʼ iluʼë döʼ quiuʼ.
12 tuʼ gunuʼ Liʼ ga uluʼzxúnnajëʼ.
13 Len yöl-laʼ huáca quiuʼ, Xan, uxicjuʼ lu gudil-la.