1 ¡Nadxíʼideʼedaʼ Liʼ, Xan!
2 Ruzóëʼ Xanruʼ nedaʼ tsutsu, en rapa chiʼë nedaʼ, en rusölë́ʼ nedaʼ.
3 Rulidzaʼ-nëʼ Xanruʼ Nu ral-laʼ cúʼuruʼ yöl-laʼ ba,
4 Iaʼlátiʼsö laʼ gútiaʼ,
5 Iaʼlátiʼsö laʼ yöjtsuʼa lataj chul-la que yöl-laʼ guti,
6 Lu le guca quiaʼ bulidzaʼ-nëʼ Xanruʼ.
7 Níʼirö gudödi budóʼ zxuʼ, en guzxizi luyú.
8 Birúaj dzön zxínëʼë,
9 Benëʼ ga bötaj lúzxiba, en bö́tajëʼ Lë cazëʼ,
10 Gudödëʼ lu böʼös dxíëʼ tu le nayë́pisë nazíʼi le querubín.
11 Busubagaʼ cuinëʼ le naca chúl-lasö.
12 Lu le rëpi yösa queëʼ lu böaj gasaj naʼ
13 Gunnë́ guziúʼ que chiʼë Xanruʼ lúzxiba xitsáʼ.
14 Gusö́l-lëʼë yuguʼ yaga lahui tuchiʼ queëʼ, en bësilásiëʼ nupa naʼ tuʼdíʼi nedaʼ.
15 Níʼirö biláʼ lahui le zoa zxan nísadoʼ,
16 Bötjëʼ zacaʼ xitsáʼalö, en gudélëʼë nedaʼ.
17 Busölë́ʼ nedaʼ lu naʼ nu bitiʼ riléʼe nedaʼ dxiʼa, en nál-latërö,
18 Cateʼ niʼ chizóa inítiaʼ gulaʼzóa réguʼë nedaʼ,
19 Bubéajëʼ nedaʼ, en buzóëʼ nedaʼ tu lu lataj zxön.
20 Bubiʼë Xanruʼ quiaʼ tsca le tsahuiʼ nacaʼ,
21 tuʼ runaʼ ca naca le rusë́dinëʼ Xanruʼ nedaʼ,
22 Runaʼ ca taʼnná xibá nunëʼ Xanruʼ,
23 Bitiʼ bi le naca döʼ nabágaʼa lahuëʼ Lëʼ,
24 Que lë ni naʼ bubiʼë Xanruʼ quiaʼ tsca le tsahuiʼ nacaʼ,
25 Ruhuéchiʼ ládxuʼu nupa tuʼhuechiʼ ladxiʼ luzë́ʼeguequi,
26 Ruluíʼi cuinuʼ idú ladxiʼ len nupa nácagaca idú ladxiʼ,
27 Rusölóʼ nupa taʼguíʼi taʼzacaʼ,
28 Ruquélaʼ cazuʼ guíʼ quiaʼ, Xanaʼ Dios,
29 Lu yöl-laʼ huáca queëʼ Dios rucul-laʼ bönniʼ guizxi yu röjáquiëʼ gudil-la.
30 Idú dxiʼa nácagaca le runëʼ Dios.
31 ¡Tuzëʼ Xanruʼ náquiëʼ Dios!
32 Dios ni ruzalëʼ nedaʼ,
33 Runëʼ ga nácagaca niʼa ca níʼagacabaʼ bidxinaʼ guixiʼ,
34 Rusédinëʼ nedaʼ para gaca tsejaʼ gudil-la,
35 Lu yöl-laʼ rusölá quiuʼ run chiʼu nedaʼ.
36 Ruchiʼu nöza ga ral-laʼ tödaʼ,
37 Guzóa réguʼa nupa tuʼdíʼi nedaʼ, en bucul-laʼ léguequi.
38 Gudinaʼ léguequi luyú, ateʼ bitiʼ guca uluʼhuöása.
39 Benuʼ nedaʼ nál-la para tsejaʼ gudil-la,
40 Benuʼ ga buluʼzxunnaj lahuaʼ nupa bitiʼ taʼléʼe nedaʼ dxiʼa,
41 Buluʼlidza nu gácalen léguequi,
42 Buzxuzxjaʼ léguequi ca bëchtö yu nachë́ʼ lu böʼös.
43 Busölóʼ nedaʼ lu náʼagaca nupa taʼdáʼbagaʼ,
44 Cateʼ taʼyöni nedaʼ, laʼ tun ca rnna xtídzaʼa.
45 Taʼcuidiʼ ladxiʼ, en lu yöl-laʼ rizxizi quéguequi
46 ¡Zoëʼ nabanëʼ Xanruʼ!
47 Náquiëʼ Dios Nu rizíʼ la nupa tuʼdíʼi nedaʼ,
48 Rusölë́ʼ nedaʼ lu náʼagaca nupa bitiʼ taʼléʼe nedaʼ dxiʼa.
49 Que lë ni naʼ guíaʼ Liʼ: Xclenuʼ Xan, lógaca bönachi zián yödzö,
50 Rusölá cazëʼ Xanruʼ bönniʼ rinná bëʼë uláz queëʼ,