1 Yawe, butjap nandɨsal mani gen tebai dɨma nayɨki.
2 Gak gaga dakon gobɨŋ naŋ yamaŋ namɨl, aŋek kɨsitgo da nɨkdak.
3 Gak da butjap nandaŋ namɨsal, do sot yokwisi asat.
4 Gulusuŋno da kɨlɨ wɨtjɨŋ namgut.
5 Gɨptɨmnokon wuda toŋ dakon tabani uŋun madepsi, ae mɨktaŋbi.
6 Butnokon jɨgɨ madepsi taŋakwan tasɨk tosot.
7 Gɨptɨmno tedepmɨsi kɨndap da yaŋ soŋ namɨŋakwan sot madepsi asat.
8 Yo kɨnda da tebaisi bamaŋ namɨsak uŋun da tɨlak nak obɨsi tasɨk taŋek yokwisi egɨsat.
9 Amɨn Tagɨ, gak da nak dakon galaktok teban nandɨsal.
10 Wamno gami pi tebaisi aŋakwan tapmɨmno mɨnisi asak.
11 Notnoni gat ae gen kaloŋno gat nak da kapmatjok ap do dɨma galak toŋ, nido wudano yokwisi.
12 Nɨkba kɨmokgeŋ do nandaŋ amɨn uŋun nak abɨdok do pat yɨpmaŋ.
13 Mani amɨn mɨrakni mɨni yombem geni dɨma nandaŋ yomɨsat.
14 Nak amɨn kɨnda gen arɨpmɨ dɨma nandagɨ, ae kobogɨ arɨpmɨ dɨma yogogɨ yombem.
15 Mani Yawe, nak gak do jomjom asat.
16 Nak bɨsit yaŋ asat, “Yum pɨndagaki sagalek nɨkban uwal da but kwaktok dɨma nandani.”
17 Nido, nak kɨlɨ uŋunjok mokdɨsat.
18 Nak gulusuŋno gagon yaŋ teŋteŋosot, aŋek yokwi agɨm do bupmɨsi nandɨsat.
19 Uwal morapno uŋun tapmɨmɨ toŋsi.
20 Nak aŋpak tagɨsi aŋ yomɨsat, mani kobogɨ do aŋpak yokwi aŋ namaŋ.
21 Yawe, dɨma nepmaŋ dekgi.
22 Amɨn Tagɨ, gak yokwikon baŋ tɨmɨt tɨmɨt amɨno.