1 Yawe, nak amɨn kɨlegɨ, do aŋpulugaŋek nandaŋ nabi do yaŋ tɨdosot.
2 Ni aŋpak da kɨlegɨ uŋun gak da nandɨsal, do aŋpulugaŋaki gen pikon teban tokeŋ dosi nandɨsat.
3 Gak da nak dakon but nandaŋ mudosol.
4 Gen tebango guramɨgek emat pɨdokyo aŋ amɨn dakon aŋpak manji yomgum.
5 Bɨsapmɨ bɨsapmɨ gak dakon kosit naŋ agek kandapno suŋ dɨma pɨlɨk bamosot.
6 Piŋkop, gak da bɨsitno dakon kobogɨ namɨsal.
7 Nin do but dasi galak taŋ nimɨsal, uŋun dakon bamɨ nolɨŋek yo tagɨsi aŋnibi.
8 Gaga dakon dabɨlgo kɨla asal uŋudeŋ kɨlano aki.
9 Yaŋ aŋaki kaŋdo uwalno da nak arɨpmɨ dɨma aŋupbal ani.
10 Amɨn dɨwarɨ do nandaŋ yawotjok dɨ dɨmasi aŋ yomaŋ.
11 Nak abɨŋ nepdosi nandaŋ teban taŋ,
12 Uŋun laion da kɨlap dap do aŋ uŋun da tɨlak, ae laion bulagɨ da pasɨlek yubɨŋ ekwaŋ uŋun da tɨlak.
13 Yawe, gak abɨŋ uwalno gat emat wamaŋek pabɨŋ yopbi.
14 Yawe, tapmɨm madepgokon da aŋpulugaŋaki uwalno da dɨma nɨkba kɨmokgeŋ.
15 Mani nak amɨn kɨlegɨ, do don gandakdɨsat.