1 Yawe aŋpakni uŋun tagɨsisi, do ya yaŋ iyɨneŋsi.
2 Nin Yawe ya yaŋ iyɨneŋ.
3 Nin Amɨn Tagɨ ya yaŋ iyɨneŋ.
4 Uŋun kaloŋ da wasok tapmɨmɨ toŋ madep asak.
5 Iyɨ da nandak nandagon da kundu ae yo morap kwen toŋ uŋun wasagɨt.
6 Mɨktɨm yɨpban kwen tagɨt, ae pakbi yɨpban mibɨlɨkon tagɨt.
7 Gɨldat gat kanek gat wasagɨt.
8 Gɨldat yɨpban gɨldat kɨnda kɨla asak.
9 Kanek gat gɨk morap gat yopban pɨlɨn kɨla aŋ.
10 Nin Yawe ya yaŋ iyɨneŋ.
11 Israel amɨn tɨmɨk paŋobɨŋakwan Isip yɨpmaŋ dekgwit.
12 Iyɨ da tapmɨm madepmon da tɨmɨk paŋopgut.
13 Tap Gami pudaŋban tɨmɨ bamorɨ agɨt.
14 Iyɨ mibɨltok kɨŋek mɨŋat amɨni tɨmɨk paŋabɨŋakwan tap ɨdap pudawit.
15 Mani Isip dakon kɨla amɨn madep gat ae emat amɨni gat yopban pakbi naŋ kɨmakgwit.
16 Mɨktɨm kɨbɨrɨ tɨmon mɨŋat amɨni mibɨltaŋ yomɨŋek kɨgɨt.
17 Kɨla amɨn madep tapmɨmɨ toŋ dapban kɨmakgwit.
18 Ae kɨla amɨn madep man bini toŋ dapban kɨmakgwit.
19 Amo amɨn kabɨ dakon kɨla amɨn madep Sion aŋakban kɨmakgɨt.
20 Ae Basan dakon kɨla amɨn madep Ok aŋakban kɨmakgɨt.
21 Aŋek uŋun kɨla amɨn madep dakon mɨktɨmni mɨŋat amɨni do yomgut.
22 Mɨktɨm uŋun oman amɨni Israel do yomgut.
23 Uwal da pabɨŋ nipgwit bɨsapmon nin do sigɨn nandaŋ nimgut.
24 Aŋek uwal da kɨsiron baŋ tɨmɨkgɨt.
25 Mɨŋat amɨnyo gat ae bɨt kɨlap morap gat jap yomɨsak.
26 Do Kwen Kokup Piŋkop ya yaŋsi iyɨneŋ.