1 UYawe là nnap ká̱ mi pa̱,
2 <<Á ya anəm, ká̱ iza̱ ikún ìba̱ngba̱ng ji iga igwong ikún va̱ ka̱ ashe nzam yà?
3 Mí ya akun ya ka̱ izər ìba̱ngba̱ng mí nəm inok ká̱ ɗò? Mwote onəm i ya akun aga nzong iya̱m ya ka̱ izəzər ɗò?
4 Dər, mí nak na ka̱ ashe apər. Kà̱ nva̱ngva̱ apər ri na chit, te i ɓyen ka̱kul nnəm nza̱ iya̱m lap yà?
5 Dər, ka̱ awalang va̱ ka̱ yà pa̱ ɗwot te á ɓyen ka̱kul inok iro ka̱t, jwak chit pa̱ apər pwák na chit, te mí nəm inok iro nəm ká̱ ɗò?
6 <<Ka̱kul nva̱ ta te, mmami, uNəm uga nzhi uYawe, n là pa̱, wa akun ìba̱ngba̱ng ka̱ ashe oga akun va̱ ka̱ ashe nzam n nak á nyáng akun apər, te wa nnà ta mi na onəm oga ntəm ka̱ ashe aUrushelima.
7 Kang mi mən ìkum ká̱ oza̱, káp ká̱ nva̱ pa̱ oza̱ fa ka̱ ashe apər ká̱ ikángkáng, ká̱ nnà te apər i ri oza̱. Kang oza̱ i nyi pa̱ mmami na uYawe, ka̱ awalang va̱ mi mən ìkum ka̱ apal oza̱.
8 Kang mi nak mbin va̱ ta i təm agung, ka̱kul oza̱ nəm nnandər ka̱t, mmami, uNəm uga nzhi uYawe n là.>>