1 Masu guaꞌa kuu ja kuun yuaꞌa yoo iꞌni,
2 Na kuinio tixiko ja tu jini ti ndenu kiꞌin ti nuu ndagua ti,
3 Na vi kanio kuai jin yoꞌo kuiñi, te na vi junkanio mentu jin yoꞌo yuꞌu ti,
4 Ma ndakaꞌan ron tnoꞌo ja tu jiniuꞌu nuu ñayiu vasa,
5 Ndakaꞌan nuu ñayiu vasa naxa kuini ja kaꞌan ron nui,
6 Te na kuinio ñayiu jaꞌnde siꞌin, te tnaꞌa mai tnundoꞌo jin jakueꞌe yun,
7 Te na kuinio siꞌin tee yakua ja tu jiniuꞌu ja kaka de,
8 Tu nagua jiniuꞌu ja tnaa ñayiu yuu nuu yoꞌo yuu nuu ja ni juꞌni yuu yun.
9 Na kuinio iñu ja ni kiuu ndaꞌa in tee jini, te tu jini de ja uꞌu,
10 Na kuinio tee tiuu jin kuji ja xtuji de ndiꞌi ni ñayiu ka yaꞌa yun,
11 Te na kuinio tiꞌina ja ndajiokuiin ti ndakaa ti ja ni ndujan ti,
12 ¿A jini ron in tee ja kaꞌan de ja tee ndichi kuu maa de?
13 Te ñayiu kuꞌndu, chi kachi: “Ma kuu kiꞌin san satniuu san vitna,
14 Te nagua jiko xtnuu yeꞌe nuu kaa ja tnii ña jin tnu,
15 Ñayiu kuꞌndu, chi skendaꞌi nuu koꞌo, su kuitai,
16 Ñayiu kuꞌndu, chi ndakani ini mai ja ñayiu ndichi ka kui,
17 Nuu kiunduu ñayiu nuu oo ja kiti ini inka ñayiu,
18 Na kuinio ñayiu ndukueꞌe ja tiuu jin kuji,
19 saa kuu jin ñayiu xndaꞌu ñayiu ndeka tnaꞌa guaꞌa jin,
20 Nuu tu na tutnu kai, te ndaꞌva ñuꞌu,
21 Jin tikayi koko ñuꞌu, te jin tutnu jikin ñuꞌu,
22 Tnoꞌo ja kaꞌan ñayiu jika jin kuentu kuu na kuinio in javixin,
23 Te na kuinio in kisi ñuꞌu ja ni ka joso jin plata,
24 Ñayiu kaꞌan uꞌu ña, chi tu xtui mai nuu kaꞌin,
25 Te ma kandija ron nuu kaꞌan vaꞌa ndevaꞌi,
26 Te visi tu xtui mai ja kaꞌan uꞌu ñai,
27 Na in jate in yau ja kanakau inka ñayiu,
28 Ñayiu kaꞌan tnoꞌo tnoꞌo, chi kaꞌan uꞌui inka ñayiu.