1 तमा ती ज्युक्ला कोन्छ्योककी थु चाङ्माकी येशूला शैतान नेमा खोक्पा ल्हापला ख्येल ज्यितुपला दासा पाङ्थेरीला टिनी गाल।
2 ते येशू ङ्यिमा खल ङ्यी सेक ङ्यी ताङ नुप्ज्या ङ्युङ्ने ज्युसिमा खोला ल्होवा लानोक।
3 ती पेला खोक्पा ल्हाप शैतान ति खोकी चाला वानी, “दोजो ख्युरुङ कोन्छ्योककी सेवु यिन्सिन दी दोतिवाला शुब्ज्याङला डोशी सिनी सी।” सिनी सिक्यासुङ।
4 यिने येशूकी तीला
5 येलुङ शैतानकी खोला यरूशलेमला टि गल्नी तेकी ल्हङाङकी चेला लानी दे च्यिनी दुक सिक्यासुङ,
6 “दोजो ख्युरुङ कोन्छ्योककी सेवु यिन्सिन देमा थुला छ्योङ्बाल ग्योप। कोन्छ्योककी सुङला दुक सिनी टि वे,
7 तमा येशूकी तीला सुङ्सुङ,
8 येलुङ शैतानकी खोला री थेन्बो यीला टि गल्नी जम्बुलिङकी तेरी ग्येल्खापतिवा ताङ ती ग्येल्खापतिवाला वोतुप डछ्यावुतिवा छ्या तेन्नी,
9 “ख्योरो ङला शावा क्यासिन ङ दी तेरी ख्युरुङला तेरिन।” सिनी सिक्यासुङ।
10 तमा येशूकी तीला
11 तमा शैतानकी येशूला क्युर ज्याक्नी गाल्सुङ। गल्सिमा देवाच्येनकी लेन क्योलुप थुतिवा वानी येशूला शब्ज्यी पुल्सुङ।
12 यूहन्ना चोन्खाङला शोर्नोक सिरुप थोनी येशू गालील लुङ्बाला लोक्नी फेप्सुङ।
13 तमा खो नासरतला क्युर ज्याक्नी कफर्नहुमला फेप्नी ते राङ ज्युसुङ। ती कफर्नहुम ति जब्लुन ताङ नप्ताली लुङ्बाला वोतुप गालील ग्येम्छो चाला ख्येल्गिनोक।
14 दी ति गोमाला कोन्छ्योककी लुङ्तेम्बा यशैयाकी तुक सिक्यावु ताम्ङे छेवुला यिन,
15 “जब्लुन लुङ्बा ताङ नप्ताली लुङ्बा ताङ ग्येम्छोला डोप लाम ताङ यर्दन चङ्बी फर्केन ताङ मिरिक यम्बातिवा देतुप गालील,
16 कोन्छ्योकला ङो माशेनी दिक्पी ओङला देतुपतिवी वोसिर ग्येर्पु यी थोङ्सुङ।
17 ती पेला नेज्युनी येशूकी “ख्यिराङ दिक्पा ने सेम ग्युर! च्यिलासिसिन देवाच्येनकी ग्येल्खाप चिप्ला राङ वा वे।” सिनी मीतिवाला सुङ ख्याप्टाक कितुप गो चुसुङ।
18 ङ्यिम्ज्यिक येशू गालीलकी ग्येम्छो गारी नेमा फेपिन वोतुप पेला पत्रुस सिरुप सिमोन ताङ तीकी नुप अन्द्रियास ति ग्येम्छो नाङ्ला जाल क्युरिन वोतुप थोङ्सुङ। तिवा ति ङ्या जिम्बुप मीतिवा यिनोक।
19 तमा खोकी तिवाला “ख्यिराङ ङे तिङ्ला तिङ्यो। तमा ङ ख्यिराङला ङ्या जिम्बुप मिन, मीतिवा जिम्बुप मी जोयिनो।” सिनी सुङ्सुङ।
20 खोकी तुक सुङ्सिमा तिवा पिन ङ्यिकर ङ्या जिम्बुप जालतिवा क्युर ज्याक्नी खोकी तिङ्ला तिङ्यासुङ।
21 खो तेसुर फेपिन वोतुप पेला येलुङ जब्दियाकी पुज्युङ याकूब ताङ तीकी नुप यूहन्ना पिन ङ्यी खोप्रे पपा जब्दियाकी मुला टी नाङ्ला देनी जाल ल्हेन्दा ग्यकिन वोतुप थोङ्सुङ। तमा खोकी तिवाला साङ कताङ्सुङ।
22 तमा तिवा खोप्रे पपा ताङ टु ति ग्यङ क्युर ज्याक्नी येशूकी तिङ्ला तिङ्यासुङ।
23 येशू गालील लुङ्बा तेरी कोरा ग्यकिन सिरा यहूदी छ्योखाङला सुङ लाप नङ्गुप ताङ कोन्छ्योककी ग्येल्खापकी कोर्ला लेन ल्यामु ख्याप्टाक कियी नम्बा बङीकी नेर्पुतिवा ताङ अमोछ्योवुतिवा तेरीला टेक च्यिसुङ।
24 तुक क्यानी सिरियाकी लुङ्बा तेरीला येशूकी कोर्ला ताम्ङे टाम्सुङ। तमा मीतिवी नेर्पु नम्बा बङीतिवा ताङ छासे सुक कितुपतिवा ताङ डे ग्यपुपतिवा ताङ जा लावुतिवा ताङ काङ्बा लाक्पा शोरुपतिवा तेरीला खोकी चाला टि वासुङ। तमा खोकी तिवा तेरीला टेक च्यिसुङ।
25 तुक क्यानी गालील लुङ्बा ताङ डेकोपोलिस ग्येसा ताङ यरूशलेम ग्येसा ताङ यहूदिया लुङ्बा ताङ यर्दन चङ्बु फर्केन नेज्युन मी मङ्मु खोकी तिङ्ला तिङ्यासुङ।