1 ङ्यिमा चेयी ज्युक्ला येलुङ मी मङ्मु जोम्सुङ, यिने ते तिवाला साप समा काङ साङ मिन्दुक। येशूकी लोमातिवाला खोरो चिप्ला कताङ्नी सुङ्सुङ,
2 “दी मीतिवाला ङ ङ्यिङ्ज्ये लङ्गिनोक, च्यिलासिसिन तिवा ङ ताङ मुला देनी तन्दा ङ्यिमा सुम गाल, तमा तिवी मुला काङ साप समा मे।
3 दोजो ङे तिवाला ल्होतुङ्बा राङ खोप्रे खाङ्बा ताङ्सिन लामला ल्होवा लानी टेन्बा तोर्किते यिन्दे। च्यिलासिसिन तिवी पर्ला थाक्रिङ्बु नेसुर वावु मीतिवा साङ वे।”
4 ती थोसिमा लोमातिवी खोला सिक्यासुङ, “दुका दासा पाङ्थेरीला दी मीतिवाला तेरुप समा कनी नेसुर ङ्येतुप्जा?”
5 तमा येशूकी तिवाला “ख्यिरे मुला शुब्ज्याङ चो वे?” सिनी टि नाङ्सिमा तिवी दिन चोके वे सिनी सिक्यासुङ।
6 खोकी मी मङ्मुला सला दे सिनी क नाङ्सुङ। तमा शुब्ज्याङ दिन ति लानी कोन्छ्योकला थुचिछे पुल्सिमा च्याक्नी मीतिवाला बिन सिनी लोमातिवाला नाङ्सुङ। तमा लोमातिवी ती ति गोनी बिन्सुङ।
7 लोङ तिवी मुला ङ्या टिक्पे साङ चेयी नोक। खोकी तीकी थोक्ला साङ कोन्छ्योकला थुचिछे पुल्सिमा मीतिवाला गो बिन सिनी लोमातिवाला नाङ्सुङ।
8 तमा मीतिवी डाता सेक सोसुङ। सोसिमा साङ लोमातिवी ल्हकुप पुर्मातिवा रुक्सालेन्सिन ती ति तोलुम दिनकी नाङ्ला क्येङ्सुङ।
9 ती पेला ते साप मीतिवा तोङ्डा ज्यी चोयी नोक। तमा येशूकी मीतिवाला ते नेसुर ताङ्सिमा
10 खो ति शार्क्येक खोरे लोमातिवा ताङ मुला टुला जेनी दलमनुथा लुङ्बाला फेप्सुङ।
11 ते फरिसीतिवा येशूकी चाला वानी खोला खोक्पा ल्हापला देवाच्येन नेमा वुङ्गुप त च्यिक छ्या तेन सिनी सिक्यासुङ।
12 तमा खोकी छासे ङ्येन्बी सोक ताङ्नी सुङ्सुङ, “च्यिला दी गिपाकी मीतिवा त छोल्गी ताङ? ङ ख्यिराङला टेङ्बो सिरिन, दी गिपाकी मीतिवी चुका त साङ ल्हाप मेङ्येवी।”
13 तेसुर खो तिवाला क्युर ज्याक्नी लोङ टुला जेनी ग्येम्छो फर्केन फेप्सुङ।
14 खोतिवा टुला फेपिन कितुप पेला लोमातिवी शुब्ज्याङ खुर्नी वुङ्गुप टोक ज्येनोक, तुक क्यानी टि नाङ्ला शुब्ज्याङ च्यिक तिराङ नोक।
15 तमा येशूकी तिवाला सुङ्सुङ, “ख्यिराङ च्याङ्से की। फरिसीतिवी खमीर ताङ हेरोदकी खमीर नेसुर कुतुक दे।”
16 तिवी खोकी दुक सुङ्गुप ति थोसिमा, “दाक्पी मुला शुब्ज्याङ मेतुप तप्की खोकी तुक सुङ्गुप यिन्दे।” सिनी खोप्राङ पर्ला केवुल क्यासुङ।
17 येशूकी ती हाक्कोनी तिवाला “च्यिला ख्यिराङ शुब्ज्याङ मेतुपकी कोर्ला ख्यिरा पर्ला केवुल किवी? ख्यिराङला तरोङ साङ छ्या मे? ख्यिरा हाक्माको? ख्यिरा सेम क्योङ्बु राङ वे?
18 ख्यिराङ मिक वोसिनाङ मोथोङ्नोक? नाम्ज्योक वोसिनाङ मोथोनोक? ख्यिराङला टेन्दा मे?
19 ङे शुब्ज्याङ ङकी मी तोङ्डा ङला च्याक्नी तेरुप पेला ख्यिरा शुब्ज्याङकी पुर्मा तोलुम चो रुवु?” सिनी सुङ्सुङ। “तोलुम च्यिङ्ङी।” सिनी तिवी सिक्यासुङ।
20 येलुङ येशूकी “शुब्ज्याङ दिनकी मी तोङ्डा ज्यीला च्याक्नी तेरुप पेला ख्यिरा शुब्ज्याङकी पुर्मा तोलुम चो रुवु?” सिनी टि नाङ्सुङ। तमा तिवी “तोलुम दिन।” सिनी सिक्यासुङ।
21 खोकी तिवाला सुङ्सुङ, “ख्यिराङ तरोङ साङ हाक्मोकोनोक?”
22 ती ज्युक्ला येशू खोरे लोमातिवी मुला बेथसेदाला लेप्सुङ। ते मीतिवी मिक मोथोङ्गुप मी यीला खोकी चाला टि वानी तीला रेक नाङ सिनी खोला गोङ्बा शुसुङ।
23 तमा खोकी ती मिक मोथोङ्गुप मीकी लाक्पाला जिम्नी युल ने पाङ्ला टि फेप्नी तीकी मिकला च्येमाक कुनी तीला छ्याक ज्याक्नी, “ख्योरो काङ रे च्यिक रे थोङ्गिनोक?” सिनी टि नाङ्सुङ।
24 तमा तीकी फार छुर ल्हयिन सिरा “मीतिवाला थोङ्गिनोक, यिने तिवा दोङ्बुतिवा दोके थोङ्गिनोक, तमा तिवा फार छुर युकिनोक।” सिनी सिक्यासुङ।
25 येलुङ येशूकी तीकी मिकला छ्याक ज्याक्सुङ। तमा तीकी ल्यामु क्यानी ल्हाप छाल्सिमा तीकी मिक ति येलुङ थोङ थुपुप गल्नी तेरी च्यालकतिवा ठछ्येली थोङ्गुप गाल्सुङ।
26 तमा खोकी ती मीला “ख्युरुङ ती युलला माडोवा।” सिनी तीला खोरो खाङ्बा ताङ्सुङ।
27 तमा येशू लोमातिवी मुला कैसरिया फिलिप्पी ग्येसाकी गारी गुरीला वोतुप युलतिवाला फेपिन कितुप पेला खोकी लोमातिवाला “मीतिवी ङला सु यिन सिनोक?” सिनी टि नाङ्सुङ।
28 तिवी सिक्यासुङ, “ललाइकी बप्तिस्मा तेरुप यूहन्ना, ललाइकी एलिया, तमा यम्बातिवी कोन्छ्योककी लुङ्तेम्बातिवी नाङ ने मिरा च्यिक यिन सिनी सिनोक।”
29 तमा येशूकी लोमातिवाला टि नाङ्सुङ, “त ख्यिराङ ति ङला सु यिन सिनी सिवी?” पत्रुसकी “गेकेन याङ ख्रीष्ट यिन।” सिनी सिक्यासुङ।
30 येशूकी तिवाला खोरो कोर्ला सुला साङ मालाप सिनी क छ्येम्बु नाङ्सुङ।
31 ती ज्युक्ला येशूकी लोमातिवाला खोरो कोर्ला दुक सिनी सुङ्गुप छाल्सुङ, “ङ मी पुज्युङला दुक्पा बङी ङ्येकिवी। यहूदी गोमा कितुपतिवा ताङ कोङ्यार छ्येतिवा ताङ यहूदी छ्योकी गेकेनतिवी ङे तेन्दोकला लानी ङला सेकिवी। यिने ङ्यिमा सुम ज्युक्ला ङ शेप ने सेन्बु लङ्गिवी।”
32 खोकी दुक सिनी ती ताम्ङे ति तिवा तेरीला हाक्कोवा क्यानी सुङ्सुङ। तमा पत्रुसकी खोला फेचेक टि गल्नी दुका ताम्ङे कितुप मेङ्गिवी सिनी वुर्तम क्यासुङ।
33 यिने येशू छुर ग्युर्नी लोमातिवाला ल्हानी पत्रुसला वोरु देनिन सिरा “शैतान, ङे चा नेवा ग्युक। ख्युरुङ कोन्छ्योक नेमा वुङ्गुप नासाम मोतोङ्नोक, मी नासाम तिराङ तोङ्गिनोक।” सिनी सुङ्सुङ।
34 ती ज्युक्ला येशूकी मी मङ्मुला खोरे लोमातिवी मुला खोरो चाला कताङ्नी सुङ्सुङ, “सु ङे तिङ्ला तिङ्योकुप नो किवे, तीकी खोरो नोवातिवा क्युर ज्याक्नी दाक दाक्पी ग्यङ्शिङ खुर्नी ङे तिङ्ला तिङ्यो।
35 सी खोरो मिजी र्होकुप नो किवे, ती ति तोर्नी डिवी। सी ङ ताङ लेन ल्यामुकी थोक्ला खोरो मिजी तोर ज्यिकिवे, ती ति र्होकिवी।
36 मीला जम्बुलिङ तेरी ङ्येसिनाङ खोरो मिजी तोर्सिन तीला काङ ख्येप्साङ ङ्येकिवी रो?
37 याङ्ना तोरुप मिजीकी छापला काङ बिन्नी खोरो मिजी लोक थुप्किवी?
38 दी शम्डेन कितुप ताङ दिक्पा वोतुप गिपा नेसुर सी ङ ताङ ङे सुङला ङोछा किवे, ङ मी पुज्युङ साङ चाङ्मा वोतुप देवाच्येनकी लेन क्येलुप थुतिवी मुला ङे पपी मोवा थोप्नी वुङ्गुप पेला तीला ङोछा कितिनो।”