1 ङ्यिरा पर्ला च्युङ्गुप ताम्ङेतिवी कोर्ला रिम्बा क्यानी टिकुप छोलुप मी बङी नोक।
2 तिवी ती च्युङ्गुप ताम्ङेतिवा थल्मा नेज्युन खोरो मिककी थोङ्गुप ताङ कोन्छ्योककी सुङ ख्याप्टाक कितुपतिवा नेसुर ङ्यिरा थोवु दोके टि वे।
3 तमा थियोफिलस ला, ङ साङ तीकी कोर्ला थल्मा नेज्युन ल्यामो क्यानी तेरी ल्हावु तप्की ती ति ख्युरुङला रिम्बा क्यानी टिकुप ति ल्यामु यिन सिनी नासाम तङ्यिन।
4 तुक क्यानी ख्युरुङला ती लापुप ताम्ङेतिवा ति टेङ्बु यिन सिनी हाक्कोशी।
5 यहूदिया लुङ्बाला ग्येल्वु हेरोदकी ग्येला कितुप पेला जकरिया सिरुप कोङ्यार यी नोक। ती ति अबिया छ्योककी कोङ्यार यिनोक। तीकी पेर्मी एलिशिबा ति हारून गिपाकी ति यिनोक।
6 तिवा ङ्यिकर कोन्छ्योककी थोङ्दाङला टेङ्बु नोक, तमा कोन्छ्योककी तेरी क ताङ ठिमला क्येन मेता क्यानी तेन्गिनोक।
7 यिने तिवाला आङा मिन्दुक, च्यिलासिसिन एलिशिबा ति रप्छ्येम नोक, तमा तिवा ङ्यिकरकी मिजी गानी सिन्नोक।
8 थेङ्मा यी जकरिया ति खोरो छ्योककी गोर्माला यहूदी ल्हङाङला कोन्छ्योककी दोङ्ला कोङ्यारकी लाका कियी नोक।
9 ती पेला कोङ्यारकी लुक्सुला ग्येन ग्यप्सुङ, तमा ल्हङाङ नाङ्ला गल्नी पो च्येतुप लाका ति जकरियाला ख्येल्सुङ।
10 तीकी पो च्येतुप पेला तेरी जोम्बुप मीतिवा ति ल्हङाङकी फिला मोपोर कियी नोक।
11 ती पेला राङ देवाच्येनकी लेन क्योलुप थु यी जकरियाकी चिप्ला छ्यर्नी पो च्येतुप छोटीकी यावी थाकाला लासुङ।
12 तीला थोङ्सिमा जकरिया छासे ज्यिवा लानी पार्सुङ।
13 यिने ती देवाच्येनकी लेन क्योलुप थु तीकी तीला सिक्यासुङ, “ओ जकरिया, ज्यिवा माकी। कोन्छ्योककी ख्योरो गोङ्बा शुवु ति सेन्नी वे। ख्योरो पेर्मी एलिशिबाकी पुज्युङ यी क्येकितो। तमा ख्योरो तीकी मिङ ति यूहन्ना सिनी तोसा।
14 ती आङा क्येसिमा ख्युरुङला गा ताङ किर्मु गितो, तमा मी बङी ती क्येवु थोक्ला गा कितो,
15 च्यिलासिसिन ती ति कोन्छ्योककी थोङ्दाङला मी छ्ये डितो। तमा तीकी गुन्डुम छ्याङ ताङ यम्बा जेप च्यालक नाम्साङ मुथुङ्तो। ती ति खोरो आमी खोकला वोतुप नेज्युनी कोन्छ्योककी थु चाङ्माकी क्येङ डितो।
16 तमा तीकी इस्राएल गिपाकी मीतिवा बङीला खोप्रे चोवो कोन्छ्योककी थाकाला ग्युर ज्यिकितो।
17 येलुङ तीकी एलियाकी सेम ताङ ङार ङ्येनी चोवो फेपुप सिनाङ गोमाला वानी पपातिवी सेम खोरो पेजातिवी थाकाला ग्युर च्यितुप ताङ कोन्छ्योककी सुङला मेङ्येन्दुपतिवाला कोन्छ्योककी थोङ्दाङला टेङ्बु वोतुपतिवी रिक्पाकी थाकाला ग्युर च्यिनी मीतिवाला चोवोकी थोक्ला टडिक कि ज्यिकितो।”
18 तमा जकरियाकी ती देवाच्येनकी लेन क्योलुप थु तीला टिसुङ, “ती ताम्ङे ति ङ चुक क्यानी तेन्तेन कितुप? त याङ ङ गावा गल्सिन्सुङ, ङे पेर्मी साङ गामा गल्सिन्सुङ।”
19 देवाच्येनकी लेन क्योलुप थु तीकी तीला सिक्यासुङ, “ङ गब्रिएल यिन। ङ कोन्छ्योककी दोङ्ला लानी देकिवी। खोकी राङ ङला ख्योरो मुला ताम्ङे कितुपला ताङ दी गाकी लेन क्योलुपला तङ्गुप यिन।
20 ती ताम्ङे ति टेके तुजेला च्युङ्गितो। यिने ख्योरो ङे सिक्यावु ताम्ङेला तेपा माक्यावु तप्की ती ताम्ङे माच्युङ्वा सेक्ला ख्युरुङ कुवा गल्नी ताम्ङे लप मुथुप्तो।”
21 ल्हङाङकी फिला मीतिवा जकरियाला गुनी देनोक, तमा ती ति ल्हङाङ नाङ्ला छासे फिमु क्यावु तप्की च्यिला यिन्दे सिनी तिवा यम्जेन लासुङ।
22 तमा जकरिया ति पाङ्ला थेन्दुप पेला तिवी मुला ताम्ङे लप मुथुपुप गाल्नोक। तुक क्यानी तिवी तीकी ल्हङाङ नाङ्ला ज्यल्का थोङ्दे यिन्दे सिनी नो क्यासुङ। तीकी तिवाला ताम्ङे मालाप्नी लाक्पी लातुक तिराङ क्यासुङ।
23 जकरिया यहूदी ल्हङाङला शब्ज्यी कितुप खोरो गोर्मा सिन्सिमा रङगी खाङ्बा लोक्नी गाल्सुङ।
24 तेमी चेयी ज्युक्ला तीकी पेर्मी एलिशिबा ति जु चेन्दी गाल्नोक, तमा ती ति ल ङ सेक यिप्नी देसुङ। तीकी दुक सिक्यासुङ,
25 “चोवोकी ङे थोक्ला दी ति क्या नङ्गुप यिन। त याङ खोकी ङला च्यम्बा क्या नङ्नी मीतिवी ङला ङ्यिङ्मर कितुप नेसुर र्होक्सुङ।”
26 तेमी ल टुककी तिङ्ला कोन्छ्योककी देवाच्येनकी लेन क्योलुप थु गब्रिएलला गालील लुङ्बाकी नासरत ग्येसाला वोतुप जेन्दी माक्यावु मरियम सिरुप पुम्पेजा यीकी चाला ताङ्सुङ।
27 तीकी जेन्दी ति दाऊद गिपाकी योसेफ सिरुप मी यी ताङ मुला कितुपला ताम्ङे थाक्छ्येनोक।
28 ती देवाच्येनकी लेन क्योलुप थु ति मरियमकी चाला गल्नी, “ख्युरुङला लोदिमु वुङ्शिता। कोन्छ्योककी ख्युरुङला छासे कटिन नङ वे। कोन्छ्योक ख्योरो मुला ज्यु वे।” सिनी सिक्यासुङ।
29 ती ताम्ङे थोनी मरियम ति छासे हलेवा लानी तीकी सिक्यावु ताम्ङेकी तेन्दोक ति काङ यिनाङ सिनी छासे यम्जेन लासुङ।
30 यिने देवाच्येनकी लेन क्योलुप थु तीकी तीला सिक्यासुङ, “ज्यिवा माकी मरियम, कोन्छ्योककी ख्युरुङला छासे च्यम्बा नाङ्नी वे।
31 त ख्युरुङ जु चेन्दी गल्नी पुज्युङ यी क्येकितो। तमा ख्योरो तीकी मिङ ति येशू सिनी तोसा।
32 खो ति छासे चोछ्येवु डितो, तमा मीतिवी खोला चोछ्येवु कोन्छ्योककी सेवु सिनी सितो। चोवो कोन्छ्योककी खोला खोकी हङ्गावा दाऊदकी ग्येल्ठिक नङ्गितो।
33 खोकी याकूबकी गिपाकी खला नरी ग्येला कितो, तमा खोकी ग्येल्खाप ति नाम्साङ ना मोडोतो।”
34 तमा मरियमकी देवाच्येनकी लेन क्योलुप थुला सिक्यासुङ, “ङ याङ जेन्दी माक्यावु पुम्पेजा यिन, तमा दी ताम्ङे ति चुक क्यानी च्युङ थुप्किवी?”
35 देवाच्येनकी लेन क्योलुप थु तीकी तीला सिक्यासुङ, “कोन्छ्योककी थु चाङ्मा ख्योरो खला फेप्कितो, तमा चोछ्येवु कोन्छ्योककी ओङ ति ख्योरो खला ख्येल्गितो। तुक क्यानी क्येप आङा ति चाङ्मा वोतुप यिन, मीतिवी खोला कोन्छ्योककी सेवु सिनी सितो।
36 ल्हो ताङ, ख्योरो छेङ्गा एलिशिबा साङ गामा गल्सिनाङ जु चेन्दी गल्नी वे। तीला रप्छ्येम यिन सिक्यासुङ, यिने त ती जु चेन्दी गल्नी ल टुक गल वे।
37 च्यिलासिसिन कोन्छ्योककी कि मुथुपु ति काङ साङ मे।”
38 तमा मरियमकी “लसे, ङ चोवो कोन्छ्योककी योक्मु यिन। ख्योरो सुङ्गुप दोके ङला च्युङ्शी।” सिनी सिक्यासुङ। ती ज्युक्ला देवाच्येनकी लेन क्योलुप थु ति मरियम नेमा क्येनी गाल्सुङ।
39 ङ्यिमा चेयी ज्युक्ला मरियम रिवा क्यानी यहूदिया लुङ्बाकी रीला वोतुप युल यीला गाल,
40 तमा ते लेप्सिमा जकरियाकी खाङ्बा शुनी एलिशिबाला “टसी देलेक!” सिक्यासुङ।
41 मरियमकी “टसी देलेक!” सिक्यावु ति एलिशिबाकी थोलुङ्मे तीकी खोकला वोतुप आङा ति फिर्सुङ।
42 ती पेला एलिशिबा कोन्छ्योककी थु चाङ्मा क्येङ्नी थोर ग्यप्नी सिक्यासुङ, “ख्युरुङ पुम्पेजातिवी पर नेमा छासे मोलाम थोपुप यिनो, ख्योरो क्येवु आङा साङ मोलाम थोपुप यिनो।
43 ङे चोवोकी आमा ङे चाला वासुङ, दुका हलेवु लाका ङला चुक क्यानी च्युङ्गुप यिनाङ?
44 ख्योरो टसी देलेक सिक्यावु ति ङे थोलुङ्मे ङे खोकला वोतुप आङा ति गा क्यानी फिर्सुङ।
45 चोवो कोन्छ्योककी ख्युरुङला सुङ्गुप ति छेकिवी सिनी तेपा क्यावु तप्की ख्युरुङला मोलाम थोपुप यिनो।”
46 तमा मरियमकी सिक्यासुङ,
47 तमा ङे सेमगी दिङ नेज्युनी ङला थर ज्यितुप कोन्छ्योकला गा किवी,
48 च्यिलासिसिन खोकी खोरो योक्मु ङला ल्हाटे क्या नाङ्सुङ।
49 च्यिलासिसिन ओङ छ्येवु कोन्छ्योककी ङे थोक्ला छासे लाका ग्येर्पु क्या नाङ वे।
50 खोकी खुरुङला ज्यिवा कितुपतिवी गिपा तेरीला नरीकी थोक्ला च्यम्बा नङ्गिवी।
51 खोकी खोरो छ्याककी राङ ओङ छ्येवु लाका क्या नाङ वे,
52 खोकी ङार छ्येवु ग्येला कितुपतिवाला ति तिवी ग्येल्ठिक नेसुर तेन ताङ्नी वे,
53 खोकी ल्होतुङ्बा वोतुपतिवाला समा ल्यामुकी डा च्यिनी वे,
54 खोकी ङ्यिरा पगावा हङ्गावातिवी मुला थाक्छ्येन नङ्गुप ति तेरी क्या नङ्नी खोरुङला शब्ज्यी कितुप इस्राएलला दाल्जा क्या नाङ वे।
55 तमा खोकी अब्राहाम ताङ तीकी तेरी गिपातिवाला नरीकी नरी च्यम्बा कितुप टोक माज्ये वे।”
56 तमा मरियम एलिशिबा ताङ मुला ल सुम चोयी देसिमा खोरो खाङ्बा लोक्नी गाल्सुङ।
57 तमा एलिशिबाकी आङा क्येप पेला लेप्नी तीकी पुज्युङ यी क्येसुङ।
58 चोवो कोन्छ्योककी तीला छासे कटिन नङ वे सिरुप थोनी तीकी युल्वातिवा ताङ छेङ्गाछालीतिवा तीकी मुला गा क्यासुङ।
59 आङा क्येवु ङ्यिमा ग्येकी छेर्मु तिवी ती आङा तीला यहूदी च्येतुप लुक्सु कितुपला वासुङ, तमा तीकी मिङ ति खोरो पपी मिङ दोके जकरिया ज्योकुप छाल्सुङ।
60 यिने आङी आमा तीकी “मिन, दीकी मिङ याङ यूहन्ना ज्योक गोकिवी।” सिनी सिक्यासुङ।
61 तमा तिवी तीला सिक्यासुङ, “ख्योरो छेङ्गाछाली नाङ्ला याङ तुका मिङ वोतुप ति सु साङ मे।”
62 तिवी आङी पपाला तीकी मिङ ति काङ ज्योकुप नो वे सिनी लाक्पी लातुक क्यानी टिसुङ।
63 तमा जकरियाकी टिकुप तक्ती यी लङ्नी ती लोला “दीकी मिङ यूहन्ना यिन।” सिनी टिसिमा तिवा तेरी हलेवा क्यासुङ।
64 ती पेला शार्क्येक जकरियाकी च्येलाक गुल्नी तीकी ख नेमा ताम्ङे लपुप छल्नी कोन्छ्योकला सोवा पुल्सुङ।
65 दी थोङ्सिमा युल्वातिवा तेरी ज्यिवा क्यासुङ। तमा ती तेरी ताम्ङे ति यहूदिया लुङ्बाकी पम्दोकला वोतुप युलतिवाला टाम्सुङ।
66 ती ताम्ङे थोवुतिवा तेरीकी खोप्रे सेमला “काङ दी आङा याङ ज्युक्ला चुका पारी गिताङ?” सिनी नो क्यासुङ। च्यिलासिसिन चोवो कोन्छ्योककी ओङ ति ती आङी मुला वुतुङ के ज्युनोक।
67 तमा आङी पपा जकरिया ति कोन्छ्योककी थु चाङ्माकी क्येङ्नी दुक सिनी नम्दर शेसुङ,
68 “इस्राएलकी चोवो कोन्छ्योकला सोवा वुङ्शी,
69 खोकी खोरो लावा दाऊदकी गिपा नेमा दाक्पुला दिक्पा ने थर ज्यितुप ओङ छ्येवु मिरा च्यिक ताङ वे।
70 तोङ्ला खोरे टेङ्बु वोतुप लुङ्तेम्बातिवी नेसुर खोकी सुङ्गुप दोके
71 दाक्पी डतिवा ताङ दाक्पुला ङ्यिङ्मर कितुपतिवी लक नेसुर दाक्पुला थर च्यिसुङ।
72 खोकी खोरे टेङ्बु वोतुप थाक्छ्येतुप ति टेन्नी दाक्पी पगावा हङ्गावातिवाला च्यम्बा क्या नाङ्सुङ।
73 ती ति खोकी दाक्पी हङ्गावा अब्राहाम ताङ मुला थाक्छ्येन नङ्गुप यिन।
74 खोकी दाक्पुला डतिवी लक नेसुर थर च्यिनी ज्यिवा माक्यावा क्यानी खोला शब्ज्यी कितुप ताङ
75 दाक्पी छे काङ खोकी दोङ्ला चाङ्मा ताङ टेङ्बु क्यानी मिजी क्योङ च्यिसुङ।
76 ओ आङो, ख्युरुङ तेरी सिनाङ चोछ्येवु कोन्छ्योककी लुङ्तेम्बा सिवितो,
77 तमा खोकी खोरो मीतिवी दिक्पा पङ्नी तिवाला थर्वा ङ्येकिवी सिरुप रिक्पा ख्युरुङ लोप्कितो।
78 च्यिलासिसिन दाक्पी कोन्छ्योक ति च्यम्बा ताङ ङ्यिङ्ज्ये कितुप यिन।
79 नक्तोमी ताङ शेपकी र्हिपला देतुपतिवाला ठछ्येली तेर च्यिसुङ,
80 तमा ती आङा ति छरिन सिरा कोन्छ्योककी थु चाङ्मा नेमा रम्बु गाल्सुङ। तमा ती ति इस्राएलकी मीतिवी मिङ्गाला वुङ्गुप सिनाङ गोमाला दासा पाङ्थेरीला राङ देसुङ।