1 Sukurumo i KAWASANA OPU roonamo Incia amalape,
2 Taroakamo o giu incia sumai abhoasakea manga mia mopadhana itolosina KAWASANA OPU,
3 tee mopadhana iromusakana minaaka i manga lipu mosagaanana,
4 Dhaangia uka manga mia mopekalingka-lingkana i tana matuu,
5 Manga incia amaara tee amatuu bhorokona,
6 Manga incia agora tee aemani tulungi i KAWASANA OPU i wakutuuna kaseke,
7 tee atondaia alaloi dhala momakate,
8 Taroakamo manga incia asukuru i KAWASANA OPU roonamo kaasina molagina,
9 sababuna Incia apatumpu incana mia momatuuna bhorokona,
10 Sagaa minaaka i manga incia auncura i nuncana kalalanda tee kagalapu,
11 roonamo manga incia adorohaka tee firimanina Aulataʼala,
12 Siitumo sababuna Incia apisaki ngangarandana manga incia tee karajaa matamo,
13 Kasiimpo manga incia agora i KAWASANA OPU i wakutuuna kaseke,
14 Manga incia apalimbaia minaaka i kalalanda tee kagalapu,
15 Taroakamo manga incia asukuru i KAWASANA OPU to kaasina molagina,
16 roonamo Incia apasaki manga bhamba tambaga,
17 Dhaangia uka momembalina mokabhongo-bhongo roonamo feʼelina manga incia modorohaka,
18 Manga incia amendeu akande opea uka,
19 Kasiimpo, manga incia agora aemani tulungi i KAWASANA OPU i wakutuuna kaseke,
20 KAWASANA OPU afirimani, tee o firimanina sumai amembali apaunto kapiina manga incia,
21 Taroakamo manga incia asukuru i KAWASANA OPU roonamo kaasina molagina,
22 Taroakamo manga incia abhawa pasombaa kasukuru,
23 Dhaangia uka mosapona mokarajaana i kapala i tawo,
24 Manga incia akamatea bhari-bharia ipewauna KAWASANA OPU,
25 Incia afirimani, sabutuna akawamo ngalu tee garura
26 Manga incia atoangka sakawana i antara, kasiimpo atotudhaaka i andalaoge.
27 Manga incia alingka kabhele-bhele tee adida mboomo mia malango,
28 Kasiimpo manga incia agora aemani tulungi i KAWASANA OPU i wakutuuna kaseke,
29 tee apaunto garura,
30 Kasiimpo manga incia akaunde-unde roonamo amalinomo,
31 Taroakamo manga incia asukuru i KAWASANA OPU roonamo kaasina molagina,
32 Taroakamo manga incia amuliangia i tanga-tangana poromusakaana uumatina,
33 Incia abhalii manga umala amembali tana matuu,
34 Tana mosuburu apamembalia tana mokogara inda momembalina ipombulaaka penembula
35 Incia uka abhalii tana matuu amembali kolam,
36 KAWASANA OPU ataroaka manga mia momaara amboore iwe sumai,
37 Manga incia ahewi manga inawu tee apombulaakea puuna angguru,
38 Minaaka i kabarakatina Kawasana Opu, manga incia ajulu o kabharina,
39 Maka sapadhana sumai, manga incia atalomea musuna, sabutuna o kabharina akuramo tee atungku i aroana bhalina,
40 KAWASANA OPU apasapoakea kahina to manga kaogesana lipuna,
41 Maka o mia misikini aangkea minaaka i kanarakaana,
42 Manga mia mobanara akamatea o giu incia sumai tee akaunde-unde,
43 Taroakamo manga mia moʼaarifu akamata bhari-bharia o giu incia sii,