1 कर्नेल फेरटोळ मणशी कैसरियाला नीलदू, वाड इटलीक फेर पलटणला शताधीपती उंड्या.
2 कर्नेल इड भक्तीमान उंडी स्वता परिवार जताक द्यावार्दी येर्पू फेटेतोड उंड्या; वाड गरीबोरकी संगेम दान धर्म शेयदू इंगा वाड हमेशा द्यावार्दी प्रार्थना शेयदू.
3 ओगा नाळ मदयाम मूड वाजशेद आप्पुड, कर्नेलकी दृष्टांत आय्या, वाड आदी स्पष्टपणे सुश्या, आ दृष्टांतला द्यावार वगा दूत वान तीकुड वच्या इंगा वान आन्या, “कर्नेला!”
4 कर्नेल द्यावार दूत तीकुड सुशी आद्री फो अन आन्या. “येम उंडाद, प्रभू?” द्यावार दूत कर्नेलान आन्या, “द्यावार नीद प्रार्थना इनिनाड, या माटलू नु गरीबोर की इचीनाव, आय द्यावार सुशीनाड द्यावार्की नीद मतीक उंडाद.”
5 नु यापो उरला मन्सूल आंपडी इंगा शिमोन फेरोन मंशीन एका दा, शिमोननी पेत्र इल्ला पण आंटार.
6 वाड शिमोन फेरोड चांभार ईलकाडा नीलस्तुनाड वांदी इल्लु समुद्र कंटामकी उंडाद.
7 कर्नेलनि माटलाडी नेन्का द्यावार दूत येली फोया मग कर्नेल वान इद्दार विश्वासी नोकरलान इंगा ओगा धर्मशील शिपाईन कुतेसकुन्या.
8 कर्नेल इ मुगुरकी आईनेद आंताच शप्या इंगा वारणी यापोक आम्पीच्या.
9 दुसरानाळ आ मन्सूल यापो उरदेगारा वचीर, आदी मद्यानदी टाईम उंड्या, आद्दे टाईमला प्रार्थना शेशेदेंक पेत्रड माडी मिन्दिक फोया.
10 पेत्रक आकाल आयीन्या, वांकी येम तरी तिना बुदि आय्या, वार पेत्र इचांग तिनेद तैयारी शेशेतापुड पेत्र बेशुद्ध आय्फो.
11 इंगा मना मुंदार मोडाम उघडाशी फेदा सुकाल लेका नालुंग कोपर्याल फटी ईडशिनेद ओगाट चादर पृथ्वी मिंदा दिगतुनाद इल्ला दृष्टांत वांकी आय्या.
12 दांटल्या पृथ्वी मिंदूळी आन्नी प्रकारी नडशेय, जरगुका फोयेय, मोडामला येगरेय पक्षील उंड्या.
13 मग ओकाट आवाज पेत्र इन्या, “पेत्र, लेय; दिनलोनी याय पण प्रानील मतका मुड.”
14 पण पेत्र आन्या, “नीन आला यपुडूच शैयान, प्रभू याद अशुद्ध इंगा अपवित्र उंडाद इल्ला याद पण तींडी नीन यपुडूच तिना लेन.”
15 पण आदी आवाज वान इंगा आन्या, “द्यावार इ माटलु शुद्ध शेशिनाड, आटलान अशुद्ध आनाक.”
16 इल्ला मूड तूकुल आय्या; मग आदी पात्र मोडामला मिन्दिक तीस्कुनीर.
17 पेत्र आद्रीगास इ दृष्टांत दी अर्थ येम उंडी इविषयला विचार शेयदेंग आंट्या, या मंदीन कर्नेल आम्पडीचीन्या, वारकी शिमोनदी इल्लु कम्पिच्या वार दरवाजा मुंदार नीला फडीनीर.
18 वार आडगीर, “शिमोन पेत्र इंदे नीलस्ताड येम?”
19 पेत्र इ दृष्टांत विषयलाने विचार शेशेतापुड, आत्मा वान आन्या, “इन, मुगुर मन्सूल नीनु फुडकुतुणार.
20 लेय इंगा पायऱ्याल दिगी किंदीक फो, येनटीक की नीने वारणी आम्पडीचीनान, एमी विचार शेयांदे वार येन्का फो.”
21 मग पेत्र किंदा आ मन्सूला तीकुड फोया, इंगा आन्या, “मीर यवारणी फुडकुतुणार वाड नीने उंडान मीर इंदूक येनटीक वचीणार?”
22 आ मन्सूल आनीर, “ओगा पवित्र द्यावारदूत मिक आमंत्रण इद्देंक कर्नेलकी शपिन्या कर्नेल इड शताधीपती उंडाड, वाड नीतिमान मणशी उंडाड वाड द्यावार्दी उपासना शेस्ताड, आंदार यहुदी मंदी वांदी आदर शेस्तार, नीनु इल्लुक कुतेशी निय माटलु इनाला इल्ला द्यावारदूत वांकी शापिनाड.”
23 पेत्र वारणी नोनिक कुतेस कोण्या इंगा मबुलाला मुक्काम शेशेदेंक शप्या, दुसरानाळ पेत्र तैयार आय्या इंगा आ मुगुर मंसुला संगा फोया, यापो इंदूटोर काही तम्मुळ पण पेत्र संगा फोईर.
24 दुसरानाळ पेत्र कैसरीया शहरला वच्या, कर्नेल वांदी दावा सूदू, वाड स्वता देगार टोर सोबतील इंगा नातेवाईक इरनि पण स्वता ईलकाडा जमा शेशिन्या.
25 यपुड पेत्र नोनिक फोया, आप्पुड कर्नेल वांकी भेटाश्या, कर्नेल पेत्रन काळ मोक्की आदरता वान नमन शेश्या.
26 पण पेत्र आन्या, “नीला फड, नीन नि लेकाने मणशी उंडान.”
27 पेत्र वान संगा माटलाळका इंटलोन्ग फोया इंगा नोना संगेम मंदी जमा आईनोर वाड सुश्या.
28 पेत्र आ मंदीन आन्या, “मिक इदी यर्का उंडाद की, यहुदी मणशी इंगोगो विदेश मंदी इल्लुक फोकाम किंवा वार संगा संबंध फेटकाम इदी यहुदी नियमलान फट्टी लेद, पण द्यावार नाक सुपिचीनाद कि, निन इंगोगो मन्सूलान अशुद्ध किंवा अपवित्र मानायाराद.
29 इद्दे कारण इचांग यपुड इ मंदी नन्नु कुतेदेंक वचीर, आप्पुड नीन वार संगा जगडाम शेयालेद, इपुड, कृपा शेशी नाक शपना, मीर नन्नु इंदू येनटीक कुतेस्तीर?”
30 कर्नेल आन्या, “नालुंग दिवस पहिला, ना इंटल्या नीन प्रार्थना शेयदुन, बरोबर इदे टाईमला आंटे मद्यांनी मूड वागता नीन प्रार्थना शेयदुन, अचानक ओगा मणशी नामुन्दार नीला फड्या, वाड लखलखीत चमकदार बटाल येस्कोंड्या.”
31 आ मणशी आन्या, “कर्नेल द्यावार नीद प्रार्थना ऐकाश्या, गरीब मंदीक याय वस्तूल नु इस्ती आय द्यावार सुश्या, द्यावार नीद मतीक तीस्ताड.
32 दांचांग यापो इ शहरला काही मन्सूल आंपडी इंगा शिमोन पेत्रन कुतेसको, पेत्र इड शिमोन चांभार ईलकाडा नीलस्तूनाड इंगा वांदी इल्लु समुद्र देगार उंडाद.
33 आप्पुड नीन लगाने मिक निरोप आंपडीस्तीन, मीर इंदूक वचीणार इदी मिद फेदाद कृपा उंडाद, इपुड माक येम पण शपेद आज्ञा प्रभूड मिक इच्चीनाड, आदी ईनदेंक मिम आंन्दार इपुड इंदू द्यावार मुंदार जमा आईनाम.”
34 पेत्र माटलाडदेंक सुरुवात शेश्या नाक इपुड इदी खरेम तेलचीनाद की, “द्यावार्की प्रत्येक मणशी सारखाने उंडाड.
35 प्रत्येक राष्ट्रला यवार पण वांदी भक्ती शेस्ताड इंगा योग्य आदी शेस्ताळ, वान द्यावार स्वीकारास्ताळ, मणशी या देशटोड उंडाड, इदी महत्वद लेद.
36 द्यावार इस्राएल मंदीन माटलाळ्या, द्यावार वारकी सुवार्ता आम्पडीच्या की, येशु ख्रिस्ततीकेल शांती दुन्यामला वचीनाद, येशुड आंदार प्रभू उंडाड.”
37 “आंता यहुदिया प्रांतला येम आय्या इदी मी आंदारकी यरका उंडाद, दांदी सुरुवात योहान मंदीक बाप्तिस्मा विषयला गालील प्रांतला याद संदेश इच्च्या, दांता आय्या.
38 नासरथ येशुन विषयला मिक यरका उंडाद, द्यावार वांकी पवित्र आत्माद इंगा सामर्थ्यद अभिषेक शेश्या, येशुड आन्नी तीकुड मंदी इचांग शिंगार शेस्का फोया, या मंदी खराब आत्माता फटीनोर उंडीर वारणी येशुड शिंगार शेश्या, येनटीक की द्यावार वान संगा उंड्या.
39 येशुड पूर्ण यहुदिया प्रांतला इंगा यरुशलेम शहरला येम-येम शेश्या आय आन्नी माटलु मिम सुस्तीम इंगा मिम वान साक्षीदार उंडाम, पण येशुन मतेशीर, कट्या क्रूस मिंदा वार वान टांगाशी मतीर.
40 पण द्यावार तिसरा दिवस वान जिवंत शेश्या द्यावार येशुन मंदीक स्पष्ट सुडानीच्या.
41 पण आंदारच मन्सूल येशुन सुडा लेर, द्यावार वारणी पहिलाने साक्षीदार आंका निवडाशिन्या, वारे वान सुशीर, आ साक्षीदार मिम उंडाम येशुड सचीनोर लोन्केल लेशीनेन्का मिम वान सोबत तिन्टीम ताग्तीम.
42 येशुड माक 'मंदीक उपदेश शेशेदेंक शप्या, जिता उंडीनोरदी इंगा सचीनोरदी न्याय शेशेदेंक द्यावार वान निवडासनाड' इदी शपिदेंक वाड माक आज्ञा शेश्या.
43 यवार पण येशुन मिंदा विश्वास फेटतार, वान क्षमा शेस्काम्ला वच्ची, येशुन फेरला द्यावार आ मणशी पापलाद क्षमा शेशी, आंदार संदेष्ट्याल इदी खरेम उंडाद इल्ला आंटार.”
44 पेत्र इदी माटलाडेतापुडे वानी माटलु इन्का कुशिन्नोर आंदार मंदी मिंदा पवित्र आत्मा दिग्या.
45 यहुदी सुंता आईनोर विश्वास फेटेतोर यवार पेत्र जताक वचीनीर, वार चकीत आय्यीर, यहुदी लेनेर मंदीमिंदा पण पवित्र आत्मा दानद वर्षाव आयनाद, दांचांग वार चकीत आय्यीर.
46 इंगा यहुदी लेनेर मंदीक वेगवेगळा भाषा माटलाडेतापुड इंगा द्यावार्दी स्तुती शेस्तापूड यहुदी मंदी इनीर.
47 मग पेत्र आन्या, “इ मंदीक नेळाता बाप्तिस्मा इद्देंक मनाम लेद आनी शकायाम, यला माक शिक्या, दान लेकाने वार की पण पवित्र आत्मा शिकीनाद.”
48 दांचांग पेत्र कर्नेल, वान नातेवाईक इंगा सोबतील वारकी येशु ख्रिस्तन फेरता बाप्तिस्मा इचेद आज्ञा शेश्या, मग पेत्र इंगा काही नाळ वार संगा नीलवाला इल्ला आ मंदी वान विनंती शेशीर.