1 Kupm nira wrkapm kil ak lanakepm melnum a pikekg rpma ep ak ai kul ai. Men pikekg nungkulkg a wulmpa, a men wamparpmewel ak wam a men almen ti atom men nira ak lanakepm melnum pa, la kil Yangkipm yiprokgen a alko yaprekg watin a ak antokg mentepm rpma wor yongkyong.
2 Kil yiprokgen a alko yaprekg watin pa pikekg palng angko wunong, men nungkulkg a wulmpa, atom men lakati nakepm la pa aklale wrisen. La kil yiprokgen a yaprekg watin a ak antokg mentepm rpma wor yongkyong pake, kil pikekg rpma nampokgen Yan ai, wa kil pikekg wa palng angko wunong eng men ti atom men ariwel.
3 Kuina ur a pikekg men nungkulkg a wulmpa pa men am lakati nakepm pake, eng mpa kipm pa wa or wris ipma wris nimpokgen men ti, atom mentepm kimeket mpa or wris ipma wris nimpokgen Yan a nimpokgen Sisas Krais Warim Kipman akilen pa.
4 Atom men nirantepm yangkipm kil, eng mpa kipm pa wa or wris ipma wris itopen kol men kil. Kol kipm ntokg kolpa pipa, men mpa itopen wail manten.
5 Men pikekg atning yangkipm wor a Sisas Krais kil laron pa atom men lakati nakepm. Maur Wailen pa kil klalen, ake miningket ketnketn ur itna kil pa, kalpis wrisen.
6 Kol mentepm lala, mentepm ti or wris ipma wris nampokgen Maur Wailen, pake atn a rpma amentepmen pa wa plan lala mentepm ti rpma kai miningket pa a pa, pa mentepm kansil. Ake mentepm antokg kuina ur a ute aklale pa.
7 Pake kol mentepm ngkom or klalen kolen kil alkil a klalen pa, pa mentepm mpa or wris ipma wris nimpokgen tita. Wa walmpopm a Sisas Warim Kipman akilen pa mpa ik klak paipmpaipm wrongkwail a mentepm ti plalng, atom mentepm palng rukis wor.
8 Kol mentepm lala mentepm ti paipmpaipm kalpisen, pa mentepm kansil ipma a mentepm almentepm ti. Atom pa plan la nikgwalpm ute aklale a Maur Wailen pa ake rpma kawor mentepm pa, kalpis.
9 Pake kol mentepm laron paipmpaipm a mentepm antokg pa, Maur Wailen mpa ik kitila nikgwalpm ute wor a kil kol pikekg kil la pa atom mpa ungkwan paipmpaipm amentepmen pa plalng, a wa kuluk klak nikgwalpm paipm wrongkwail a mentepm pa, atom mpa mentepm palng rukis wor.
10 Pake kol mentepm lala mentepm ti ake antokg paipmpaipm ur pa, pa mentepm plan kolen lala Maur Wailen pa kil melnum a la yangkipm kansil. A wa plan la la yangkipm akilen pa ake rpma kawor ipma amentepmen ti pa, kalpis.