1 ⴹⵗ ⴹⵢ ⴶⵎⵢⴰ ⴹⵗⵓⵏ ⵢⴰ ⵎⴹⵔⵢⵏⵏ ⴼⵍ ⵜⵛⵜ ⵜⴰ ⴶⴰ ⵎⵛⵏⴰ ⵎⵂⵏⵏ ⴹ ⵜⴾⴼⵎ ⵛⵗⵙⵓⵏⵓⵏ ⵆⵍⵏⵜ ⵜⴾⵜⵢ ⵜⴹⵔⵜ ⵤⴹⴶⵜ ⵜⴶⵔⵤⵜ ⵢ ⵎⵛⵏⴰ⵰ ⵎⴾⵏ ⴹⵗ ⵙ ⵤⴰ ⵜⴶⵎ ⵢ ⵎⵛⵏⴰ ⵍⵗⵀⴹⴰ ⵓⵏ ⵜⴹⵜ⵰
2 ⴹ ⵓⵔ ⵜⵢⵎ ⵎⵏⵓⵏ ⵙⵎⵜⵢⵏ⵿ⴾⵓⵏ ⵤⵎⵏ ⵓⵏ ⵏⵂⴰ ⴹⴰ ⵎⵔⴹⴰ ⴾⵍⵔ ⵢⵓⵜ ⵎⵏⵓⵏ ⴾⵓⵏ⵿ⵜⵛⵛⵏⵢ ⵜⵢⵜⵢⵏⵓⵏ ⵜⴰ ⵜⵢⵏⵢⵜ ⴼⵍ ⴹ ⵜⴶⵔⵎ ⵜⵔⴹⵎ ⴹⵗ ⵙⵔⵜ ⵓⴰ ⵎⵙⵏ ⵜⵔⴰ ⵏⵎⵛⵏⴰ ⵜⵎⵙⵏ ⵓⴰ ⵍⵗⵏ ⴹⵓⴰ ⴶⵔⵤⵏ ⵢ ⵎⵛⵏⴰ ⴹⵓⴰ ⴾⵎⵍⵏ⵰
3 ⵔⵜ ⴹⴰ ⵓⴰ ⴶⵏⴰ ⵢⴾⵢⵏ ⴹⵗⵓⵏ ⵙⵙⵀⵀ ⵏⵔⵈⵎⵜ ⵜⴰ ⴹⴶⴰ ⵎⵛⵏⴰ ⴹ ⵓⵔ ⵜⵆⵍⵎ ⵢⵜⴹⵏ ⵤⵤⵓⵔⵏⵏ ⵎⵏⵙⵏ ⴾⵍⵔ ⴶⵓⵜ ⵢ ⵎⵏⵓⵏ ⴹⴼ ⴶⵏ ⵙⵏⵢⵜ ⵜⵍⵗⵜ ⵓⵍ ⵓⵏ ⵙⵤⴶⵤⵏ ⵓⴰ ⴾⴼⴰ ⵎⵛⵏⴰ ⵢⴾⵢⵏ ⴹⵗⵓⵏ⵰
4 ⴾⵢⵏ ⴹⵗⵏⴰ ⵜⵗⵙⴰ ⵢⴹⴰ ⵍⴰ ⵎⵛⵏ ⵜⴶⴰ ⴹⵗ ⵜⵙⵍⴹ ⴶⵜⵏⵏ ⵎⵔⵏ ⵛⵙⵍⴹ ⵛⵏ ⴹⵏ ⴾⵢⵜ ⴹⵛⵗⵍⵏⵜ⵰
5 ⵎⴾⵏ ⴹⵗ ⵙ ⵏⴾⵏⵢ ⵏⴶⵜ ⵎⵛⵏ ⵜⵗⵙⴰ ⵢⴹⴰ ⵏⵎⵙ ⴹⵗ ⵜⵔ⵿ⵜⵢⵜ ⴹⵍⵎⵙⵈ ⵎⵔⵏ ⴾⵢⵏ ⴹⵗⵏⴰ ⵎⵙ ⵜⵙⵍⵜ ⴹⵗ ⵍⵌⵎⵗⵜⵏⵏⴰ⵰
6 ⵎⵛⵏ ⵏⴶⵔⵓ ⵛⵂⴾⵜⵏ ⵓⵔ ⵏⵍⴰ ⵓⵍⵏⵏ ⵙⵔⵈⵎⵜ ⵜⴰ ⵜⵜⵓⴾⴼⵜ ⴾⵢⵏ ⴹⵗⵏⴰ⵰ ⵙ ⵎⵙ ⵙ ⴶⵔⵓ ⵢⵏ ⴹⵗⵏⴰ ⵜⵂⴾⵜ ⵏⵎⵍ ⵢⵢⵜⴹⵏ ⵙⵍⵏ ⴼⵍⵙ ⴹⵤⵤⵀⵜ ⵎⵛⵏⴰ ⵛⵛⵗⵍⵜⵜ ⵓⵍ ⵓⵏ ⵙⵓⴰ ⴹⵔ ⴶⴹⴰ ⵤⴶⵤⵏⵜ⵰
7 ⵓⵙ ⵜⵂⴾⵜⵏⵜ ⵜⴹⵂⵍ⵿ⵜ ⵏⵢⵜⴹⵏ ⴹⵂⵍⵜⵏ⵰ ⵓⴰ ⴶⵔⵓⵏ ⵜⵂⴾⵜ ⵏⵙⵙⵗⵔⵢ ⵙⵙⵗⵔⵓⵜ⵰
8 ⵓⴰ ⴶⵔⵓⵏ ⵜⵛⵜ ⵏⵓⴹⵏ ⵜⵍⵎⵏ ⵢⵢⵜⴹⵏ ⴼⵍ ⵎⵏ ⵎⵤⵍⵜ ⵙⵓⵏ⵰ ⵓⴰ ⴶⵔⵓⵏ ⵜⵛⵜ ⵏⵓⴹⵏ ⵜⵂⴰ ⵜⵂⴾⵢ ⴾⴼⵜ ⵙⵓⵍ ⵢⵏ⵿ⴹⴰ⵰ ⵓⴰ ⴶⵔⵓⵏ ⵜⵤⵔ⵿ⵜ ⴶⵓⵜ ⵜⵤⵔ⵿ⵜ ⵏⵍⵎⵈⵙⴹ⵰ ⵓⴰ ⵜⵙⵏⵏ ⴹⵗ ⵢⵜⴹⵏ ⵓⵏ ⵎⵗⵜⵔⵏⵏ ⵙⵏⵜ ⴹⵗⵙⵏ ⵙ ⵎⵏ ⴼⵍⵓⵙⵏⵏ⵰
9 ⵜⵔⴰ ⵜⵜⵓⵔ⵿ⵜⴶⵤ ⵜⵍⵎⵏⴼⵆⴰ⵰ ⴾⵢⴹⵜ ⵔⵜ ⴾⵍ ⵓⴰ ⵎⵙⵏ ⵜⴾⵎⴰ⵰ ⵤⵤⵓⵜⵜ ⵓⵍⵏ ⴹⵗ ⵎⵤⵍ ⵏⵓⴰ ⵍⵗⵏ⵰
10 ⴹⵗ ⵀⵜⵓ ⵜⴰ ⵜⵆⵍⵜ ⵜⵔⴰ ⵜⴰ ⴶⵔ ⵎⴹⵔⵢⵏ
11 ⴹⵗ ⵀⵜⵓ ⵜⴰ ⵜⵆⵍⵜ ⵛⵗⵍ
12 ⴹⵗ ⵀⵜⵓ ⵜⴰ ⵜⵆⵍⵜ ⴶⵢ ⵏⵜⵎⴰ ⴼⵍⵓⵙⵜ⵰
13 ⴹⵂⵍⵜ ⵎⵤⴹⴶⵏ ⴹⵗ ⴹⵔⵔⵜⵏⵙⵏ
14 ⵜⵜⵔⵜ ⴶⵏ ⵍⵀⵔⴾⴰ ⵢⵢⵜⴹⵏ ⵓⵏ ⴾⵓⵏⴹⴶⵤⵏⵏ⵰ ⴹ ⵓⵔ ⵜⵍⵗⵏⵎ ⵓⴹⵏ ⵓⵍⵢⵏ ⴾⵍⵔ ⵜⵜⵔⵜ ⵢⵢⵜⴹⵏ⵰
15 ⵙ ⵜⴶⵤⵎ ⵢⵜⴹⵏ ⴼⵍⵓⵙⵏⵏ ⵜⴼⵍⵓⵙⵎ ⴾⵓⵏⵢ ⴹⴰ ⵙ ⵜⴶⵤⵎ ⵓⵏ ⵂⵍⵏⵏ ⵜⵍⵎ ⴾⵓⵏⵢ ⴹⴰ⵰
16 ⵏⵎⴶⵓⵜ ⴹⴼ ⵢⵏ⵿ⴹⴰ ⴶⵔⵓⵏ⵰ ⴹ ⵓⵔ ⵜⴶⵎⵢⵎ ⵍⵎⵆⵎ ⵢ ⵎⵏⵓⵏ ⴾⵍⵔ ⴶⵎⵢⵜ ⵓⴰ ⵓⵔ ⵏⵍⴰ ⵏⵢ⵰ ⴹ ⵓⵔ ⵜⴶⵎ ⴹⴼ ⵏⵙ ⵜⵎⵙⵎ ⵎⵍⵏ ⵏ⵿ⵜⵢⵜⵢ⵰
17 ⴹ ⵓⵔ ⵜⵤⵍⵎ ⵜⴾⵎⴰ ⵙ ⵜⴾⵎⴰ ⵢⵓⴹⵏ ⵓⵍⵢⵏ⵰ ⴶⵎⵢⵜ ⵓⴰ ⵍⵗⵏ ⵗⵔ ⵢⵜⴹⵏ ⴾⵍ ⵙⵔⵙ ⵜⵜⵎⵤⵍⵎ⵰
18 ⵙ ⵎⴾⵏ ⵓⵏ ⴾⵜ ⵆⵏ ⴹⵗⵓⵏ ⴹⵢ ⵎⵍⵜⵓ ⵍⵈⵔ ⴶⵔⵓⵏ ⴹⵓⴹⵏ ⴾⵍ⵰
19 ⴹ ⵓⵔ ⵜⵤⵤⵍⵎ ⵢ ⵎⵏⵓⵏ ⵎⵔⵏⵏ ⴾⵍⵔ ⵢⵓⵜ ⵍⵂⵎ ⵓⵏ ⵎⵛⵏⴰ ⴹ ⵛⵗⵍ ⴼⵍⵙ ⵏⵏ ⵍⴾⵜⵀⵏ «ⵏⴾ ⵜⵀⵤⵏ ⵙⵛⵔⵗⴰ ⵏⴾ ⵤⵈⴾⵎⵏ ⵢⵓⴹⵏ ⴾⵍ ⵓⴰ ⴹⵔ ⵂⵔ ⵏⴰ ⵎⵍⵢ⵰»
20 ⴾⵓⵏⵢ ⵎⵔⵏ ⵔⵜ ⴹⴰ ⵓⴰ ⴾⵓⵏⵓⵔⵏ «ⵙ ⵜⵏⵢⵗ ⵤⵏ⵿ⴶⵓⵏⴾ ⵂⵢ ⴶⵍⴾ ⵜⵛⵜⵛⵆⵓ⵰ ⵙ ⵜⵂⴰ ⴼⴹ ⴹⵗ ⵜⵛⵛⵓⵆⵓ⵰ ⴼⵍⵙ ⵙ ⴹⵙ⵿ⵜⴶⵗ ⴹⵢ ⵤⵏ ⵙ ⵜⵙⵏ⵿ⵙⴰ ⴼⵍ ⵗⴼⵏⵜ ⵛⵎⴾⵜⵏ ⵔⵗⵏⵏ⵰»
21 ⴹⴾⵓⵔⵍⴾⵎ ⴹ ⵜⵢⵗ ⵛⵔ ⵙⴼⵍⴹⵓ ⴹⵏⴶⴾ ⴾⵍⵔ ⵗⵍⵀ ⵛⵔ ⵙⵎⵤⵍ ⵏⵓⴰ ⵍⵗⵏ⵰