1 Mukama Luhanga wa Bu̱toki̱ Bwona,
2 Luhanga akubbyokelelagha ku̱lu̱gha Sayu̱u̱ni̱,
3 Luhanga waatu akwisa,
4 Akubilikila eghulu kandi nsi nga baakai̱so,
5 Akughila ati, “Mukumaani̱ye bantu banje beesighibuwa mubandeetele,
6 Eghulu likulangililagha ngoku Luhanga ahi̱ki̱li̱i̱ye,
7 Ai̱ enu̱we bantu banje, mu̱u̱ghu̱we ebi nkwete ku̱bu̱gha,
8 Tankubasoghosagha haabwa bihonguwa byanu
9 Tankwetaaghisibuwa bihonguwa bya ntu̱u̱li̱ sya nte syanu,
10 Bisolo byona ebili mu ki̱bhi̱li̱ mbyanje
11 Nimani̱ye noni̱ syona esili haa myena
12 Njala niyaanankwete tankubaghambila,
13 Si̱ye buuye nkuliyagha nyama sya ntu̱u̱li̱ sya nte,
14 Oleke kihonguwa kyanu ewaa Luhanga kibe ku̱mu̱si̱i̱ma
15 Nimwatu̱ngi̱ye kijibu mumbilikile,
16 Bhaatu Luhanga akughilagha bantu babhi ati,
17 Mukubhengagha si̱ye kubahana
18 Musuma oghu mwakaboone akubaagha bhootu̱ syanu
19 Kanu̱wa kaanu kaasuuyemu bubhi
20 Mukaakubaagha musitami̱ye mutandika ku̱bu̱ghʼo kubhi baghenji̱ baanu
21 Mukwete kukola ebi byona,
22 Mwekuukemu enu̱we boona abanjibuluuwe,
23 Kuhaayo ku̱si̱i̱ma kwanu niikiyo kihonguwa eki̱ku̱mpaagha ki̱ti̱i̱ni̱sa