1 हति ङिनला जब लोब्टुबे टाँगा फेलिन राङ पुइसोङ, तेहि हिब्रुतेबे विरोधला ग्रिक यहुदिबे नाला छेलसोङ, चिचालानाना बारतैयि ङ्योपा घोतितुइना हतिबे राढियातेबाला कोइबा होएता ङ्योपा मिखुबा।
2 तेहि च्युनङि गारयि लोब्टुतेबे तुमला क्ये ताङदे नाइसोङ, “कजसुबे वचन टाइक्ये किच्याइ ताङदे सायाप राङ थुङयापयि स्यापच्यि स्युङान हुला ल मिहा।
3 हतिचाला भाइबा, खे फ्येने पवित्र आत्मा राङ रिक्पि खाँखाँबा राङ सम्मान पोरो खुखुबा मि तुन होतो सुला ङे धुला लाइला धाम ज्याइ।
4 हिन्नाङ हु मोनलाम राङ वचनयि स्यापच्यिला समय पोरो तेरच्याइ ना।”
5 धि ताम तुमयि पोरोला सम ठेसोङ राङ झोझोमा पोरोला ल स्येसोङ, राङ हतिबे पवित्र आत्मा राङ हिछेयि खाँखाँबा स्तिफनस, फिलिप, प्रखरस, निकनोर, तीमोन, पर्मिनास राङ एन्टिओखियायि यहुदि मत मानि किङान निकोलाउसला धामसोङ।
6 हतिबे हति मिला लोब्टुबे धुनला ख्योसोङ राङ लोब्टुबे मोनलाम क्यापसोङ राङ हतिबे थोला रेँ लाक्पा पोरसोङ।
7 कजसुबे वचन फाकिन् राङ पुइसोङ, राङ लोब्टुबे टाँगा यरुश्लेमला लेइराङ फेलसोङ। पुजारितेबे नाङने लेइराङयि धि हिछेला ङ्यानसोङ।
8 स्तिफनसला ङिङच्ये राङ शक्तियि खाँरे मितेबे उइला हा:लाइयापयि लाइ छेयाछेया राङ शक्तियि लाइ क्याइसोङ।
9 हिन्नाङ रेन रेनते सुते स्वतन्त्र तुमयि यहुदि झोमसि खिमतेबा (धि मिन हति राङ ना), राङ कुरेनि, अलेक्जेन्ड्रिया, किलिकिया राङ एशियायि मितेबा हिना, हतिबा लाँरे स्तिफनस ङ्याबो नारे किताला छेलसोङ।
10 हति काङ रिक्पा राङ आत्मायि लाम्ला नेन, हतिबे ख्युइ सामाना कि माङ्युइसोङ।
11 तेहि हतिबे फा:ला मितेबाला हुर:स्युइ लाङदे जु नारु च्युसोङ, “मोशा राङ कजसुबायि विरोधला धि फा:ला ताम अल नानाइबा ङि थोइसोङ।”
12 तेहि हतिबे जनता, केवा किङान गुरु राङ शास्त्रिबाला घो ख्यामदु च्युसोङ, राङ हतिबाला छेलसोङ राङ सुङदे यहुदि नेता झोमसि खिमला ख्योसोङ।
13 हतिबे जु नायाप चुन साछितेबाला ताङला सारि क्याइसोङ, “धि मियि पवित्र सा राङ ठिमयि विरोधला ताम नायाप मितोङा।
14 चिचालानाना धि जु नानाइबा ङि थोइसोङ, ‘नासरतयि येशुयि धि साला मासि लोङान ना, राङ मोशायि ङेला पिपिना धार्मिक लुलाम याङ च्येङान ना।’”
15 यहुदि नेतातेबा झोमसि हतिबा पोरोला ल क्याइरे ताइसोङ, राङ हतिबे धुनयि भाग तेङलायि लोन खेरङानयि धुनयि भाग च्वरा थोङसोङ।