1 Ne Paul, sosona Sailas ita Timoti do leta ema girumantitana e ekelesia Tesalonaika bedewe wanwanlala manlawo, e God mida no Mamamba ita Tatamba Iesu Keriso do deaitene wainilana.
2 Nuawadawada amonawa ita wanwan euda Mamamba God ita Tatamba Iesu Keriso mampoa e manlawo winompa, niapo!
3 Sumanai sosomba, no inseitana eulena walama uduudu e baila God mampe auwantonta. Ipawa e sumanaila inilene odene debamaidaleide, ita e eda nuawadawadala sumanai sosola mampo do debamaleide.
4 E epe dewaitilana baiwa no God ekelesiawa uduudu bedeuwo e asola waite umanala diamoitana. Tane e poka eteile ita apana e kadileia bedewe badowa eneile aitilana mai sumanaila eipona, dia. Sa baiwa do no e asola waitana.
5 E poka bedewainta badowa eneile aitilana. Ita poka daitada sa sabamosadie euwanede God ipa dodomana os kotuleide: Me ando e mainila ewedia osowe dialepie wapiase, “E ipa dodomanaida, God gonaawa bedewe odana rua.” God gonaawa ipa sa baiwa e tauma poka eteilana.
6 God ipa dodomanaida, sa baiwa mo mida e kadileia sipoa me ando kadimopi.
7 Tane mo mampo poka eteilana bedewe God e saulepi ita wadaaubalepie no do osombo sai wadepiaubepi. Tatamba Iesu me enseliwa mukamukaua ita ia iilala epawa do uboe sabamolepie wisepio dewa ema uduudu segantopu.
8 God apana mida mai me insaisawantoipe waimoipona ita do Gagalo euda Tatamba Iesu umanawa adiananasaia walama sawo matangelamopi.
11 Sa baiwa no walama uduudu e baila rauparintitana God e dewalepio wanwan euda dodomana e apalena rua wanlempa. Do rauparintitana dima euwa e baiwaitilana, ita do e sumanaila nolawa me mukawa mampe dewasampo ulaipalempa.
12 Ne epe rauparintedina no Tatamba Iesu ebowa e bedelawo sapaidalepie debamalepio edawa e me bedewe sapaidaitane debamaitana. Dewa ema uduudu no Godimba ita Tatamba Iesu Keriso nuawadawadau amonawa bopawa wadatana bedewe segalepie sabamolepi.