1 ויהיו חיי שרה מאת שנה ועשרים שנה ושבע שנים שני חיי שרה
2 ותמת שרה בקרית הארבע אל עמק היא חברון בארץ כנען ויבא אברהם לספד לשרה ולבכותה
3 ויקם אברהם מעל פני מתו וידבר אל בני חת לאמר
4 גר ותושב אנכי עמכם תנו לי אחזת קבר עמכם ואקברה את מתי מלפני
5 ויענו בני חת את אברהם לאמר לא
6 שמענו אדני נשיא אלהים אתה בתוכנו במבחר קברינו קבר את מתך איש ממנו את קברו לא יכלה ממך מקבר מתך
7 ויקם אברהם וישתחוי לעם הארץ לבני חת
8 וידבר אתם לאמר אם יש את נפשכם לקבר את מתי מלפני שמעוני ופגעו לי בעפרון בן צהר החתי
9 ויתן לי את מערת המכפלה אשר לו אשר בקצה שדהו בכסף מלא יתננה לי בתוככם לאחזת קבר
10 ועפרון ישב בתוך בני חת ויען עפרון החתי את אברהם באזני בני חת לכל באי שער עירו לאמר
11 לא אדני שמעני השדה נתתי לך והמערה אשר בו לך נתתיה לעיני בני עמי נתתיה לך קבר מתך
12 וישתחוי אברהם לפני עם הארץ
13 וידבר אל עפרון באזני עם הארץ לאמר אך אם אתה לי שמעני נתתי כסף השדה קח ממני ואקברה את מתי שם
14 ויען עפרון את אברהם לאמר לא
15 אדני שמעני ארץ ארבע מאות שקל כסף ביני ובינך מה הוא ואת מתך קבר
16 וישמע אברהם אל עפרון וישקל אברהם לעפרן את הכסף אשר דבר באזני בני חת ארבע מאות שקל כסף עבר לסחר
17 ויקם שדה עפרון אשר במכפלה אשר על פני ממרא השדה והמערה אשר בו וכל העץ אשר בשדה אשר בכל גבולו סביב
18 לאברהם למקנה לעיני בני חת בכל באי שער עירו
19 ואחרי כן קבר אברהם את שרה אשתו אל מערת שדה המכפלה על פני ממרא היא חברון בארץ כנען
20 ויקם השדה והמערה אשר בו לאברהם לאחזת קבר מאת בני חת