1 ויהוה פקד את שרה כאשר אמר ויעש יהוה לשרה כאשר דבר
2 ותהר ותלד שרה לאברהם בן לזקניו למועד אשר דבר אתו אלהים
3 ויקרא אברהם את שם בנו הנולד לו אשר ילדה לו שרה יצחק
4 וימל אברהם את יצחק בנו בן שמנת ימים כאשר צוה אתו אלהים
5 ואברהם בן מאת שנה בהולד לו את יצחק בנו
6 ותאמר שרה צחק עשה לי אלהים כל השמע יצחק לי
7 ותאמר מי מלל לאברהם היניקה בנים שרה כי ילדתי לו בן לזקניו
8 ויגדל הילד ויגמל ויעש אברהם משתה גדול ביום הגמל את יצחק בנו
9 ותרא שרה את בן הגר המצרית אשר ילדה לאברהם מצחק
10 ותאמר לאברהם גרש את האמה הזאת ואת בנה כי לא יירש בן האמה הזאת עם בני עם יצחק
11 וירע הדבר מאד בעיני אברהם על אודת בנו
12 ויאמר אלהים אל אברהם אל ירע בעיניך על הנער ועל אמתך כל אשר תאמר אליך שרה שמע בקולה כי ביצחק יקרא לך זרע
13 וגם את בן האמה הזאת לגוי גדול אשימנו כי זרעך הוא
14 וישכם אברהם בבקר ויקח לחם וחמת מים ויתן אל הגר שם על שכמה ואת הילד וישלחה ותלך ותתע במדבר באר שבע
15 ויכלו המים מן החמת ותשלך את הילד תחת אחד השחים
16 ותלך ותשב לה מנגד הרחק כמטחוי קשת כי אמרה אל אראה במות הילד ותשב מנגד ותשא את קולה ותבך
17 וישמע אלהים את קול הנער ויקרא מלאך אלהים אל הגר מן השמים ויאמר לה מה לך הגר אל תיראי כי שמע אלהים את קול הנער באשר הוא שם
18 קומי שאי את הנער והחזקי את ידך בו כי לגוי גדול אשימנו
19 ויפקח אלהים את עיניה ותרא באר מים ותלך ותמלא את החמת מים ותשק את הנער
20 ויהי אלהים את הנער ויגדל וישב במדבר ויהי רבי קשת
21 וישב במדבר פראן ותקח לו אמו אשה מארץ מצרים
22 ויהי בעת ההיא ויאמר אבימלך ופיכל שר צבאו אל אברהם לאמר אלהים עמך בכל אשר אתה עשה
23 ועתה השבע לי באלהים הנה אם תשקר לי ולניני ולנגדי וכחסד אשר עשיתי עמך תעשה עמדי ועם הארץ אשר גרת בה
24 ויאמר אברהם אנכי אשבע
25 ויוכיח אברהם את אבימלך על אדות באר המים אשר גזלו עבדי אבימלך
26 ויאמר אבימלך לא ידעתי מי עשה את הדבר הזה וגם אתה לא הגדת לי וגם אנכי לא שמעתי בלתי היום
27 ויקח אברהם צאן ובקר ויתן לאבימלך ויכרתו שניהם ברית
28 ויצב אברהם . שבע כבשות צאן לבדהן
29 ויאמר אבימלך אל אברהם מה הנה שבע הכבשות האלה אשר הצבת לבדהן
30 ויאמר אברהם כי את שבע הכבשות תקח מידי בעבור תהיה לי לעדה כי חפרתי את הבאר הזאת
31 על כן קרא למקום ההוא באר שבע כי שם נשבעו שניהם
32 ויכרתו ברית בבאר שבע ויקם אבימלך ופיכל שר צבאו וישבו אל ארץ פלשתים
33 ויטע אברהם אשל בבאר שבע ויקרא שם בשם יהוה אל עולם
34 ויגר אברהם בארץ פלשתים ימים רבים