1 אלה המשפטים אשר תשים לפניהם
2 כי תקנה עבד עברי שש שנים יעבדך ובשבעית יצא לחפשי חנם
3 אם בגפיו יבוא בגפיו יצא אם בעל אשה הוא ויצאה אשתו עמו
4 אם אדניו יתן לו אשה וילדה לו בנים או בנות האשה וילדיה תהיה לאדניו והוא יצא בגפיו
5 אם אמר יאמר העבד אהבתי את אדני את אשתי ואת בני לא אצא חפשי
6 והגישו אדניו אל האלהים והגישו אל הדלת או אל המזוזה ורצע אדניו את אזנו במרצע ועבדו לעלם
7 וכי ימכר איש את בתו לאמה לא תצא כצאת העבדים
8 אם רעה היא בעיני אדניה אשר לא העדה והפדה לעם נכרי לא ימשל למכרה בבגדו בה
9 ואם לבנו יעדנה כמשפט הבנות יעשה לה
10 ואם אחרת יקח לו שארה כסותה וענתה לא יגרע
11 ואם שלש אלה לא יעשה לה ויצאה חנם אין כסף
12 מכה איש ומת מות יומת
13 ואשר לא צדה והאלהים אנה לידו ושמתי לך מקום אשר ינוס שמה
14 וכי יזד איש על רעהו להרגו בערמה מעם מזבחי תקחנו למות
15 ומכה אביו ואמו מות יומת
16 וגנב איש ומכרו ונמצא בידו מות יומת
17 ומקלל אביו ואמו מות יומת
18 וכי יריבון אנשים והכו איש את רעהו . . . ולא ימות ונפל למשכב
19 אם יקום והתהלך בחוץ על משענתו ונקה המכה רק שבתו יתן ורפא ירפא
20 וכי יכה איש את עבדו או את אמתו . ומת תחת ידו מות יומת
21 אך אם יום או יומים יעמד לא יומת כי כספו הוא
22 וכי ינצו אנשים ונגפו אשה הרה ויצא ולדה ולא יהיה אסון ענש יענש כאשר ישית עליו בעל האשה ונתן בפללים
23 ואם אסון יהיה ונתתה נפש
24 תחת נפש עין תחת עין שן תחת שן יד תחת יד רגל תחת רגל
25 מכוה תחת מכוה פצע תחת פצע חבורה תחת חבורה
26 וכי יכה איש את עין עבדו או את עין אמתו ושחתה לחפשי ישלחנו תחת עינו
27 ואם שן עבדו או שן אמתו יפל לחפשי ישלחנו תחת שנו
28 וכי יכה שור או כל בהמה את איש או את אשה ומת סקל יסקל הבהמה ולא יאכל את בשרו ובעל הבהמה נקיא
29 ואם בהמה מכה היא מתמול שלשום והועד בבעליו ולא ישמרנו והמית איש או אשה הבהמה תסקל וגם בעליו יומת
30 אם כפר יושת עליו ונתן פדיון נפשו ככל אשר יושת עליו
31 או בן יכה או בת . כמשפט הזה יעשה לו
32 אם עבד תכה הבהמה או אמה כסף שלשים שקלים יתן לאדניו והבהמה תסקל
33 וכי יפתח איש בור או כי יכרה איש בור ולא יכסנו ונפל שם שור או חמור וא כל בהמה
34 בעל הבור ישלם כסף ישיב לבעליו והמת יהיה לו
35 וכי יגף שור איש או כל בהמתו את שור רעהו או את כל בהמתו ומת ומכרו את . החי וחצו את כספו וגם את המת יחצון
36 או נודע כי בהמה מכה היא מתמול שלשום ולא ישמרנו בעליו שלם ישלם בהמה תחת בהמה והמת יהיה לו
37 וכי יגנב איש שור או שה וטבחו או מכרו חמשה בקר ישלם תחת השור וארבע צאן תחת השה