1 ⲟⲩⲯⲩⲭⲏ ⲇⲉ ⲉⲥϣⲁⲛⲉⲓⲛⲉ ⲛⲟⲩⲇⲱⲣⲟⲛ ⲉϣⲱⲡⲉ ⲟⲩⲥⲁⲙⲓⲧ ⲡⲉ ⲁⲩⲱ ⲉϥⲉⲡⲉϩⲧⲛⲉϩ ⲉϩⲣⲁⲓ ⲉϫⲱϥ ⲁⲩⲱ ⲛϥⲕⲱ ϩⲓϫⲱϥ ⲛⲟⲩⲗⲓⲃⲁⲛⲟⲥ ⲟⲩⲑⲩⲥⲓⲁ ⲅⲁⲣ ⲡⲉ</ab>
2 ⲁⲩⲱ ⲉϥⲉⲉⲛⲧϥ ⲉⲣⲁⲧⲟⲩ ⲛⲉⲛϣⲏⲣⲉ ⲛⲁⲁⲣⲱⲛ ⲛⲟⲩⲏⲏⲃ ⲁⲩⲱ ⲉϥⲉⲙⲉϩⲧⲟⲟⲧϥ ⲛϭⲓ ⲡⲟⲩⲏⲏⲃ ⲉⲃⲟⲗ ϩⲙ ⲡⲥⲁⲙⲓⲧ ⲙⲡⲛⲉϩ ⲙⲛ ⲡⲗⲓⲃⲁⲛⲟⲥ ⲧⲏⲣϥ ⲛⲧⲉⲡⲟⲩⲏⲏⲃ ⲧⲁⲗⲟ ⲙⲡⲣⲡⲙⲉⲉⲩⲉ ⲉϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲉⲩⲑⲩⲥⲓⲁ ⲛⲥϯⲛⲟⲩϥⲉ ⲙⲙⲁϩ ⲙⲡϫⲟⲉⲓⲥ</ab>
3 ⲡⲕⲉⲥⲉⲉⲡⲉ ⲇⲉ ⲉⲃⲟⲗ ϩⲛ ⲧⲉⲑⲩⲥⲓⲁ ⲉϥⲉϣⲱⲡⲉ ⲛⲁⲁⲣⲱⲛ ⲙⲛ ⲛⲉϥϣⲏⲣⲉ ⲛⲉⲧⲟⲩⲁⲁⲃ ⲛⲛⲉⲧⲟⲩⲁⲁⲃ ⲉⲃⲟⲗ ϩⲛ ⲛⲉⲑⲩⲥⲓⲁ ⲙⲡϫⲟⲉⲓⲥ</ab>
4 ⲉϥϣⲁⲛⲉⲓⲛⲉ ⲇⲉ ⲛⲟⲩⲇⲱⲣⲟⲛ ⲙⲡϫⲟⲉⲓⲥ ⲟⲩⲑⲩⲥⲓⲁ ⲉⲥⲟⲩⲟϣⲙ ϩⲛ ⲟⲩⲗⲓⲃⲁⲛⲟⲥ ⲉϥⲉⲉⲓⲛⲉ ⲛϩⲉⲛⲟⲉⲓⲕ ⲛⲁⲑⲁⲃ ⲉⲃⲟⲗ ϩⲛ ⲟⲩⲥⲁⲙⲓⲧ ⲉϥⲟⲩⲟϣⲙ ϩⲓ ⲛⲉϩ ⲁⲩⲱ ϩⲉⲛⲗⲁⲅⲁⲛⲟⲛ ⲛⲁⲑⲁⲃ ⲉⲩⲧⲁϩⲥ ⲉⲛⲉϩ</ab>
5 ⲉϣⲱⲡⲉ ⲇⲉ ⲧⲉⲑⲩⲥⲓⲁ ⲟⲩⲉⲃⲟⲗ ⲧⲉ ϩⲛ ⲟⲩⲧⲱϣ ⲛⲗⲁⲕⲛⲧ ⲉϥⲉϣⲱⲡⲉ ⲡⲉ ⲉⲩⲥⲁⲙⲓⲧ ⲡⲉ ⲉϥⲟⲩⲟϣⲙ ϩⲓ ⲛⲉϩ</ab>
6 ⲁⲩⲱ ⲉⲕⲉⲡⲟϣⲟⲩ ⲛⲅⲁⲁⲩ ⲛⲗⲁⲕⲙ ⲗⲁⲕⲙ ⲛⲅⲡⲉϩⲧⲛⲉϩ ⲉϩⲣⲁⲓ ⲉϫⲱⲟⲩ ⲟⲩⲑⲩⲥⲓⲁ ⲧⲉ ⲙⲡϫⲟⲉⲓⲥ</ab>
7 ⲉϣⲱⲡⲉ ⲇⲉ ⲡⲉⲕⲇⲱⲣⲟⲛ ⲟⲩⲉⲃⲟⲗ ⲡⲉ ϩⲛ ⲟⲩⲉⲥⲭⲁⲣⲁ ⲉⲩⲉⲧⲁⲙⲓⲟϥ ⲛⲟⲩⲥⲁⲙⲓⲧ ϩⲓ ⲛⲉϩ</ab>
8 ⲁⲩⲱ ⲉϥⲉⲉⲓⲛⲉ ⲛⲧⲉϥⲑⲩⲥⲓⲁ ⲉⲧⲉϥⲛⲁⲧⲁⲙⲓⲟⲥ ϩⲛ ⲛⲁⲓ ⲙⲡϫⲟⲉⲓⲥ ⲁⲩⲱ ⲉϥⲉⲉⲓⲛⲉ ⲙⲙⲟⲥ ⲉⲣⲁⲧϥ ⲙⲡⲟⲩⲏⲏⲃ ⲁⲩⲱ ⲉϥⲉϩⲛⲧϥ ⲉϩⲟⲩⲛ ⲉⲡⲉⲑⲩⲥⲓⲁⲥⲧⲏⲣⲓⲟⲛ</ab>
9 ⲛⲧⲉⲡⲟⲩⲏⲏⲃ ϥⲓ ⲉⲃⲟⲗ ϩⲛ ⲧⲉⲑⲩⲥⲓⲁ ⲙⲡⲉⲥⲣⲡⲙⲉⲉⲩⲉ ⲛⲧⲉⲡⲟⲩⲏⲏⲃ ⲧⲁⲗⲟϥ ⲉϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲟⲩⲑⲩⲥⲓⲁ ⲧⲉ ⲛⲥϯⲛⲟⲩϥⲉ ⲙⲙⲁϩ ⲙⲡϫⲟⲉⲓⲥ</ab>
10 ⲡⲉⲧⲛⲁⲥⲉⲉⲡⲉ ⲇⲉ ⲉⲃⲟⲗ ϩⲛ ⲧⲉⲑⲩⲥⲓⲁ ⲉϥⲉϣⲱⲡⲉ ⲛⲁⲁⲣⲱⲛ ⲙⲛ ⲛⲉϥϣⲏⲣⲉ ⲛⲉⲧⲟⲩⲁⲁⲃ ⲛⲧⲉⲛⲉⲧⲟⲩⲁⲁⲃ ⲉⲃⲟⲗ ϩⲛ ⲛⲕⲁⲣⲡⲱⲙⲁ ⲙⲡϫⲟⲉⲓⲥ</ab>
11 ⲑⲩⲥⲓⲁ ⲛⲓⲙ ⲉⲧⲉⲧⲛⲁⲉⲛⲧⲟⲩ ⲉϩⲣⲁⲓ ⲉⲧⲁⲗⲟⲟⲩ ⲉϩⲣⲁⲓ ⲙⲡϫⲟⲉⲓⲥ ⲛⲛⲉⲧⲉⲛⲧⲁⲙⲓⲟⲟⲩ ϩⲓ ⲑⲁⲃ ⲑⲁⲃ ⲅⲁⲣ ⲛⲓⲙ ϩⲓ ⲉⲃⲓⲱ ⲛⲓⲙ ⲛⲛⲉⲧⲉⲛⲡⲓⲥⲉ ⲉⲃⲟⲗ ⲛϩⲏⲧϥ ⲉⲧⲁⲗⲟ ⲉϩⲣⲁⲓ ⲙⲙⲁϩ ⲙⲡϫⲟⲉⲓⲥ</ab>
12 ⲟⲩⲇⲱⲣⲟⲛ ⲛⲁⲡⲁⲣⲭⲏ ⲉⲧⲉⲧⲛⲉⲉⲛⲧⲟⲩ ⲙⲡϫⲟⲉⲓⲥ ⲛⲛⲉⲩⲧⲁⲗⲟⲟⲩ ⲇⲉ ⲉϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲉⲩⲥϯⲛⲟⲩϥⲉ ⲙⲙⲁϩ ⲙⲡϫⲟⲉⲓⲥ</ab>
13 ⲁⲩⲱ ⲇⲱⲣⲟⲛ ⲛⲓⲙ ⲛⲧⲉⲧⲉⲛⲑⲩⲥⲓⲁ ⲉⲧⲉⲧⲛⲉϫⲟⲕⲣⲟⲩ ⲛϩⲙⲟⲩ ⲛⲛⲉϥⲱϫⲛ ⲛϭⲓ ⲡⲉϩⲙⲟⲩ ⲛⲧⲇⲓⲁⲑⲏⲕⲏ ⲙⲡⲛⲟⲩⲧⲉ ⲉⲃⲟⲗ ϩⲛ ⲛⲉⲧⲉⲛⲑⲩⲥⲓⲁ ⲇⲱⲣⲟⲛ ⲛⲓⲙ ⲛⲧⲉⲧⲏⲩⲧⲛ ⲉⲧⲉⲧⲛⲉϯϩⲙⲟⲩ ⲉⲣⲟⲟⲩ</ab>
14 ⲉⲕϣⲁⲛⲉⲓⲛⲉ ⲇⲉ ⲛⲟⲩⲑⲩⲥⲓⲁ ϩⲉⲛⲛⲉⲕⲣⲱⲧ ⲛϣⲟⲣⲡ ⲙⲡϫⲟⲉⲓⲥ ⲉⲕⲉⲉⲓⲛⲉ ⲛⲛⲉⲕϭⲣⲱⲱϭ ⲛϣⲟⲣⲡ ⲉⲁⲩⲥⲉⲕ ⲁⲩⲁⲛ ⲁⲩⲱ ⲛⲥⲉⲡⲱϩ ⲉⲩⲟⲩⲟϫ ⲙⲡϫⲟⲉⲓⲥ ⲁⲩⲱ ⲉⲕⲉϫⲓ ⲉϩⲣⲁⲓ ⲛⲧⲉⲑⲩⲥⲓⲁ ⲛⲛⲉⲕϭⲣⲱⲱϭ ⲛϣⲟⲣⲡ</ab>
15 ⲛⲅⲡⲱϩⲧ ⲉϩⲣⲁⲓ ⲉϫⲱⲥ ⲛⲟⲩⲛⲉϩ ⲛⲅⲕⲱ ⲛⲟⲩⲗⲓⲃⲁⲛⲟⲥ ϩⲓϫⲱⲥ ⲟⲩⲑⲩⲥⲓⲁ ⲅⲁⲣ ⲧⲉ</ab>
16 ⲁⲩⲱ ⲉⲣⲉⲡⲟⲩⲏⲏⲃ ⲧⲁⲗⲟ ⲉϩⲣⲁⲓ ⲙⲡⲉⲥⲣⲡⲙⲉⲉⲩⲉ ⲉⲃⲟⲗ ϩⲛ ⲛⲉⲛⲧⲁⲩⲡⲱϩ ⲙⲛ ⲡⲛⲉϩ ⲙⲛ ⲡⲉⲥⲗⲓⲃⲁⲛⲟⲥ ⲧⲏⲣϥ ⲟⲩⲕⲁⲣⲡⲱⲙⲁ ⲙⲡϫⲟⲉⲓⲥ ⲡⲉ</ab>