1 «Amma sohõ, boroyaŋ kaŋ ay žen ey ga haaru ay ra,
2 Macin no ngi kabey gaaboo gʼa hanse ya ne?
3 Jaŋay nda heray gʼi yalaafandi,
4 I ga saajoo fita ciiri-ciirante kaa tuuri kaccey ra kʼa ŋaa,
5 I gʼi gaaray kʼi kaa adamizey ra,
6 I ga koy goro goorey tondey ra,
7 I ga hẽe tuuri kaccey gamey ra,
8 Boro yaada izeyaŋ no,
9 Sohõ, agay ti ngi doonoo,
10 I ga konna agay, i ga hibi ay ga,
11 Zama Irkoy kʼay biraa yorkandi,
12 Boro laaley wey tun ka kay ya ne kʼay cewey tuti,
13 I ga fondo dunbu ay ga kʼay halaciroo ceeci,
14 I na fun beeri kaa cetaa ra ka kaa ay ga,
15 Hunburay beeri kaŋ ay ga,
16 Sohõ, agay aloomuroo goo ma ben,
17 Cijin here, farayanoo ga too hala ay birey do,
18 Irkoy nʼay bankaaraa cendi kʼa dii nda gaabi,
19 A nʼay warra batakaraa ra,
20 Ay ga kaati ka faaba ceeci ni ga, amma nʼsi tuuru ya ne,
21 Ni bere ka binebibay ay ga,
22 Nʼga hewoo kʼay zaa, kʼay bere,
23 Ay ga bay, ni mma mʼay ka koy buuyan ga
24 Boro kaŋ goo ma halaci si nga kabey šerre wala?
25 Ya na hẽe borey se kaŋ goo waati šenda ra wala?
26 Ay ga gomni tammahã,
27 Ay binoo si fay nda hẽeni,
28 Ay gaahamoo bibi, amma manʼti waynaa no,
29 Ay tee nzoŋawey armaa,
30 Ay kuuroo ga bibi ay ga,
31 Ay kuntijoo si hẽe de kala buuyan dooney se,