1 Cha Pablo chada ai degange ba ulita Jesucristo gerua gaba ulia una Efesoge alin:
2 Cha takalin Chube che Ñenua kaire Jesucristo che Chugagwalla age no no ba ulita toinga una Efesoge alin, Chube kaire Jesucristo ba ulita ta gbe nga suga no ole.
3 Che Jesucristo gau ulia mo Chugagwallale gire Chube Jesucristo Ñenua diali age tanre no che ulita alin, e giti nga suga noare chadi gerule no Chube ole, cha gerule no ama ole ene: “Chube toinga nga ngaña giti, ba noare ulia, ba kweri, ba diali age no cha ulita Jesucristo gerua gaba ulia alin.” Che gerudale no Chube ole ene. Ulia Jesucristo giti Chube ageba no tanre che alin.
4 Unsuialin Chube bebi nga ulita dodade gire, uñadu Chubege che be Jesucristo gerua gai ulia, Chube che gau ama alin enebi, gire ene che chege no trate che me chege jiske che agedu me no giti Chube gwa giti. Chube mo ta gbu no ene che ole,
5 Chubege ulita uñadu unsuialin tangle che be mo ta gbe no ama ole, ama ta du no che alin, unsuialin tangle ama mo ta gbu che gai Jesucristo giti mau alin nga suga no ole ene che ulita chege ama oliale ama takalin kare.
6 Ulia Chube agedu ene no che alin malen che gerudale no Chube giti nga suga no ole diali, ene chke uñale kwian ulitage Chube no che ole Chube agedu no che alin, ene ama kaire gerule no Chube giti. Chube noare mo Kirolla Jesucristo ole, Jesucristo giti Chube kle age no no che alin.
7 Chube ta no no che ole, ama mo Kirolla Jesucristo kagu nga dba ai giti boi daga ngwale che ulita alin, Jesucristo jokeda kruge che agedu me no giti, Jesucristo jokeda giti Chube che jun siere ji chugege che agedu me no ulita gdale, che agedu me no ulita Chube talla mliunga.
8 Cristo giti Chube che ta gbe ngle, kaire Chube che ta gbe suge che toidale trate ama gwa giti.
9 Chube mo ta gbu gwangea ama be age ulita Cristo giti kwian alin, uñadu Chubege lledale ama be Cristo kage nga dba ai giti, agwa kwian ulitage geru e me chku uñale. Agwa bdagli Chube che ulita amanu ta gbu chke Cristo giti ama mo ta gbu gwangea age giti che alin Cristo giti.
10 Kaire gwangea Chube mo ta gbu kwian gdaite gdaite ulita gbe ule kwaitre alin, lle nga ngaña gitimu lle nga dba ai gitimu kaire kwian ulita Chube be gbeni naskuni Cristo kote lle dodaba no ulita nge jondege alin kare. Chui e chke gire Cristo be chege kweri lle ulita kwian ulita Chugagwallale.
13 Kaire ene agwe ba kwian me israelita Chube gerua ulia Cristo giti keruchugu ba geru e gau ulia mo tale, geru e gai ulia giti ba chegu gitiru ji chugege ba agedu me no gdale. Ba Cristo gerua gau ulia gire Chube mo Oña gbu ba tale ama nu gerubabi gwangea be kete bage kare, ene Chube Oña giti ñage suge trate ba Chubenu.
14 Chube Oña kle che ulita Chubenu tale, e giti chke uñale chege Cristo gai giti Chube che jun siere ji chugege agedu me no gdale. Chube Oña giti uñale chege che be joge toi chui tangle diali Chube ole ama nu chui gbaba kare. Chube agedu no ene ulita che alin ama tadukalin kare malen che toidale no trate Chube takalin kare kwian na gwa giti, kaire Chube agedu no che alin giti che Chubenu gerudale no Chube giti ene: “Chube no kweri, ama kle age no no che ulita kwian amanu alin.” Chube agedu no che alin giti chedi nga suga noare, che gerudale no ama giti ama gbe kweri no kwian na gwa giti gire ene kaire agwe kwian na be gerule no Chube giti.
15 Chube agedu ulita no che alin Jesucristo giti malen nga suga noare chadi ba ulita mo ta gbu Jesucristo gai ulia mo tale, chku uñale chage ba ulita una Efesomu kle Jesu gai ulia mo Chugagwallale ba kle ama gerua gbe gdadi, chku uñale chage ba kle mo ta dbe no daba ulita Jesucristo gerua gaba ulia ole.
16 Ba kwian ene malen cha gerule no Chube ole Chube kle ba ta gbe age ene giti, nga suga noare chadige Chube kle age no ba alin ama kle ba ta gbe toi no daba na ole.
17 Che Chugagwalla Jesucristo Ñenua Chube ama noare kiraske, ama ole cha kle gerule ba giti ene: “Chube, ba kwian una Efesomu bai kaire ba gerua Jesucristo giti gaba ulia, ba ama ulita ta gbe ngle diali mo Oña giti, ene be suge amage ba kle age no ama alin ulia, e giti be suge amage ba talla mine.
18 Kaire Chube, ba ama ta gbe suge ama Jesucristo gerua gaba giti ama ñage toi diali no ba ole chui tangle, kaire ba ama ta gbe suge ba kle age no ngle diali ama alin chui negege tangle kaire chui bdagli be chkege, ba be chege ama ole ama manade no no diali.