1 Duhlu dzãtsi curat, cã tu chirolu di soni niscãntsã va u aleapidã pistea, sh-va urmeadzã duhurili arãdioasi shi nvitsãturili a demonjilor.
2 Atselji nveatsã arãdearili cu ipucrizii, sh-au conshtintsã moartã, sh-arsã cu her ardios.
3 Elji va curmu nsurarea shi va s-vã urseascã s-nu mãcats niscãnti di mãcãrili tsi Dumnidzãlu adrã si s-ljea cu hãristisiri di atselji tsi pistipsescu shi l-cunoscu alihea.
4 Cã itsi fãpturã a Dumnidzãlui easti bunã sh-tsiva nu easti ti arucari, macã s-ljea cu hãristisiri,
5 cã easti sãmtsãsitã prit zborlu a Dumnidzãlui sh-prit pãrãcãlsirea.
6 Macã lã-li nvetsi aesti lucri a fratsilor sh-a surãrilor, tini va s-hii un huzmichear bun al Isus Hristos, hrãnit cu zboarili a pistiljei sh-a nvitsãturãljei atsiljei buni, tsi urmeshti.
7 Dipãrteadzã-ti di pãrãvuliili zurliti sh-prufani, shi nveatsã-ti tu dumnidzãsiri,
8 cã talimea a truplui easti ti putsãn chiro axiu, ma dumnidzãsirea easti axiu ti itsido, cã ari tãxirea a banãljei di tora sh-atsiljei tsi va yinã.
9 Aestu zbor easti pistipsit sh-axiu di apruchiari didip.
10 Trã-aestã, noi ma lucrãm multu shi alumtãm, cã avem nãdãit la Dumnidzãlu atsel yiulu, tsi easti Ascãpãtorlu a tuts oamnjilor, sh-ma multu a pistimenjilor.
11 Ursea aesti shi nvetsã-li aesti lucri.
12 Vãrã s-nu u atimuseascã tinireatsa a ta atsea noaua, ma fã-ti exemplu di pistimenji tu zbor, tu purtari, tu vreari, tu pisti sh-tu chischineatsã.
13 Bagã mintea la ghivãsirea discljisã a Scriturãljei, la urnipsirea shi la nvitsãturã pãnã s-yinã mini.
14 Nu lalasã dupã mãnã doara tsi ts-easti datã prit prufitipsiri, cu bãgarea a mãnjilor pri tini di-la aushlji.
15 Minduia-ti di aesti shi s-armãnji didip tu aesti, tsi nãintarea a ta s-hibã vidzut di tuts.
16 Afirea-ti tini sh-nvitsãtura a ta, veaglji aesti lucri, cã, fãcãnda ashãtsi, va s-ascachi bana a ta shi atselji tsi ti ascultã.