1 Ai̱ Ruhanga, twegwi̱ri̱ na mapokopo geetu̱,
2 Weewe wankei na mukono gwamu waabi̱ngi̱ri̱ waasi̱gu̱ra banyamahanga,
3 Babbaabeetu̱ batakasi̱ngu̱re gi̱gyo nsi hab̯wa mpirima zaab̯u,
4 Ai̱ Ruhanga, weewe oli mukama wange,
5 Banyanzigwa beetu̱ tu̱basi̱ngu̱ra hab̯wa b̯u̱sobozi̱ b̯wamu,
6 Tinsobora kwesiga b̯uta b̯wange,
7 Bei̱tu̱ weewe otujuna hali banyanzigwa beetu̱,
8 Twesu̱gu̱syanga weewe Ruhanga,
9 Bei̱tu̱ hataati̱ otu̱swi̱ri̱ kandi watub̯undaaza,
10 Oleki̱ri̱ banyanzigwa batwi̱ru̱kya,
11 Otu̱heeri̱yo batwi̱te nka ntaama gibakugyenda kusala,
12 Waatu̱ndi̱ri̱ bantu baamu b̯usa,
13 Otu̱heeri̱ kubba ki̱joogo mu bataahi̱,
14 Otu̱leeteeri̱ kubba binugwa mu mahanga,
15 Biro byense ndibata ninswaraswara,
16 hab̯wa bigambu bya bab̯wo banjooga,
17 Bibi byensei̱ bi̱twi̱zi̱ri̱ho,
18 Mitima myetu̱ timikakurugangaho,
19 Bei̱tu̱ nab̯wo otu̱tweri̱ watuguma mu misege,
20 Kakubba twali twebeereeri̱ Ruhanga weetu̱,
21 Ruhanga yaaku̱lemeerwe kwahi kukyega?
22 Bei̱tu̱ hab̯wamu, biro byensei̱ twicala ni̱twi̱twa,
23 Ai̱ Mukama, byoka! Hab̯waki otu̱lekereeri̱?
24 Hab̯waki otwebi̱si̱ri̱ho?
25 Kubba myozo myetu̱ myehi̱nyi̱ri̱ hansi mwicuucu,
26 Byoka oi̱ze otujune,